MCCCI misuporta sa Alkan SSSya program

CEBU, Philippines - Mipadayag og suporta ang mga sakop sa Mandaue City  Chamber of Commerce and Industry (MCCCI) sa gilusad nga programa sa buhatan sa Social Security Security (SSS) nga gitawag  nilang AlkanSSSya.

Kini  mahimo  kaayo  pinaagi sa paggahin og salapi  nga  isulod  sa  steel box nga maoy depositohan sa maong monthly contribution sa mga sakop   sa SSS nga mga informal settler sa dakbayan.

Si Marlene Bedia nga maoy MCCCI  executive director mipadayag  sa  ilang  silbi  nga   abag   sa  mga kawani sa gagmay nga negosyante ,  ingon  man  mga vendor  sa merkado publiko, traysikol drayber, habal-habal drayber ug ingon man ang kagatusan ka mga traysikad drayber sa dakbayan ug uban pa.

Matud pa ni Bedia nga maayo ang katuyoan sa AlkanSSSya  program sa SSS  sanglit  mohatag  kini og kasiguroan sa mga kabus sa dakbayan.

Nasuta sa SSS nga kun   mapasagdan lamang sa kagamhanan ang maong sector sa katilingban dili gayud mahimong sakop sa SSS.

Si Bedia miingon nga   sa pagkakaron  usa pa lamang ka steel box ang  gipagama sa  SSS  ug posible nga madugangan pa kini  aron  maoy  dipositohanan  sa premium  sa  mga informal settler nga bag-o  nahimong  sakop  sa SSS. Si Bedia miingon nga ilang hatagan og hugtanong suporta ang  tanang  mga magpapatigayon sa dakbayan sanglit ang ordinaryong mga molupyo mao   man   usab ang ilang konsumedor nga kun wala sila, wala gayu’y  maayong kalamboan ang patigayon.

Si Nanette Baguiran nga maoy account  officer sa SSS sa dakbayan sa Lapulapu maoy gitahasan sa pag-atiman sa mga sakop sa Mandaue  nga mahimo kining direkta nga maduol sa mga manindahay, mga kargador  ug mga traysikol drayber kun nagkinahanglan kini og dugang  kasayuran sa maong programa nga gipasiugdanan sa  nahisgotang buhatan. (BANAT NEWS)