Burger machine gitulisa’g P150

CEBU, Philippines - P150  nga  kuwarta  ug   usa ka cell phone  sa tindera  sa usa ka Burger  Machine   maoy   gisakiyo sa duha ka wala  hiilhing  armadong mga tulisan   didto  sa barangay  Basak, dakbayan  sa Mandaue sa miaging  kaadlawon.

Si PO2 Richard Ares sa kapolisan sa Presinto 3 sa Mandaue City Police Office (MCPO) mibutyag  nga ang   nabiktima  mao  si Judy Manlunas, 25, nga taga Zone Ube sa barangay  Paknaan  sa maong  dakbayan,  ug  maoy  tindera  sa Angel Burger Machine nga nahimutang sa barangay Basak.          

Si PO2 Ares  nagkanayon  nga  nagbinugtong  ra sa maong higayon  si Manlunas  nga nagbantay  sa maong  tindahan  dihang  may  miabot  nga  duha  ka  lalaki  nga  gituohan  niyang  mga  kustomer.

Tungod  kay  mapahiyumon  man  kaayo  ang  usa  kanila, mapahiyumon  usab  kaayong  nangutana  ang  biktima  kun   pila ka hamburger  ang  orderon  niini.

Apan matud  pa  wala na motubag   ang  duha  sa pangutana sa tindera  ug dali kining nakaibot sa giluklok nilang armas   dayon  mideklarar nga tulis ug gipangayo ang tanang halin sa tibuok gabii nga pagpamaligya niini.

Ang tindira nga gikuyawan nga pusilon sa mga tulisan hugtanong mibalibad nga nihit kaayo ang iyang customer niadtong higayona ug P150 lamang gayod ang sulod sa iyang kaha.

Dugang pa ni PO2 Ares nga ang tulisan nga nahinayak sa ilang pagpanulis midaginot na lang sa pagkuha sa maong kantidad nga gisulod sa kaha ug gilakip  sa pagsakiyo ang cell phone sa biktima nga nagkantidad og P1,000.

Human  makuha  ang  P150  ug  ang cell phone  sa tindera  dali kaayong  nakalayas    pahilayo  sa maong  dapit  nga  naglakaw  ang  mga  tulisan.

Ang  biktima  dali kaayong  nakasumbong sa kapolisan  apan  pag-abot sa mga  polis wala  na ang  maong mga  tulisan  ug  maoy ilang  gipangita  karon. (BANAT NEWS)