MCIAA padayong gisingil sa buhis nga Pl.2 bilyones

CEBU, Philippines - Kun  makabayad  sa  P1.5 bilyones   nga  buhis  ang  Mactan Cebu International Airport Authority  (MCIAA) ngadto  sa kagamhanan  sa  dakbayan  sa Lapulapu, dako kaayo  kini  og   ikatabang  sa mga  suliran  sa kagamhanan  sa  maong dakbayan.

Kini ang gipadayag ni Mayor Paz Radaza kinsa  miingon  nga  usa  sa problema  karon  sa kagamhanan  sa Lapulapu  mao  ang  kakuwang  sa  mga  lawak  saringan  niini.

Gani iyang  gihangyo  ang  mga  magtutudlo  sa eskuylahang  publiko  sa maong  dakbayanan  nga  motabang  usab  sa paghangyo  sa MCIAA  nga  pabayran  ang  ilang  utang  sa buhis.

Kini  aron  magamit  sa kagamhanan  alang  sa pagpatukod  og  mga  dugang  edipisyo  sa eskuylahan  aron  madugangan  ang  mga  lawak  tun-anan  sa mga  estudyante.

Gani  miingon  si  Radaza  nga  sa pag-abli  sa klase  niadtong  unang  Lunes  sa Hunyo,  mikabat  sa 500  ang kuwang  sa  mga  lawak  saringan.

Apan  tungod  kay  may  mga  pribadong  kompaniya  nga  mipatukod  og  mga  edipisyo  sa  tulunghaan,  mikibra  ang  gidaghanon  sa lawak  klasehanan.

Miingon siya nga  sa pagkakaron  anaa  nalang  sa 362  ang  kuwang sa  mga  lawak  klasehanan.

Hinuon  giila ni  Radaza ang mga pribadong sector ug NGO nga mitabang sa pag-ugmad og  dugang pang  mga  lawak  saringan nga ilang gidonar sa mga publikong tulunghaan sa kabarangayan.

Naglakip sa mga pribado ug NGO nga mitabang sa katukoran sa dugang mga lawak saringan mao ang Ramon Aboitiz Foundation, Lexmark International Philippines Incorporated, Philipines Business for  Social Progress ug uban pa. (BANAT NEWS)