Lapulapu paspas nga milambo – Radaza

CEBU, Philippines - Ang kakulang sa sugang dagitabnon, kaguba sa dalan ug pagtipun-og sa  mga basura sa kabarangayan maoy pipila sa mga suliran  nga gisagobang sa katawhan nga nagkinahanglan og pagtagad sa kagamhanan.

Si  Mayor Paz Radaza  miawhag sa iyang mga kaubanan   nga ang maong suliran nga nasinati karon sa katawhan maoy nahimong resulta sa paspas usab nga kalamboan sa dakbayan nga naangkon niining panahona.

Matud pa niya  nga nagkinahanglan kini og mga kakugi sa tanan nga nag-alagad sa kagamhanan aron sa paghatag og tukmang kasulbaran sa nasinati nga kakulian sa katawhan sa pagtubag sa serbisyo nga ilang gikinahanglan.

Gitataw niya nga naglakip na niini ang  suliran sa trapiko sa kadalanan, kangitngit sa lugar sa panahon sa kagabhion tungod kay kulang ang mga sugang dagitabnon, kahugaw sa merkado publiko, paghitak sa illegal nga drugas, guba nga mga dalan. Ang pagpataka lang og labay sa mga basura sa daplin sa dalan  maoy gilantaw  ni Radaza  nga  usa  ka dakong  suliran  nga  angayang  hatagan og dinaliang pagtagad.

Matud pa niya nga naangkon sa dakbayan ang mega development nga gibubo sa maong dapit ang mokabat sa P40 bilyones nga kantidad nga maoy naghatod niini sa hilabihan ka paspas nga paglambo nga nakaingon usab sa pag-usbaw sa gidaghanon sa mga molupyo.

Kini ang hinungdan nga nahimo usab nga suliran ang kakulang sa batakang serbisyo sa katawhan nga naglakip na niini ang kakuwang sa water supply, power alang sa mga sugang dagitabnon ug kadalanan. (BANAT NEWS)