Aksidente sa N. Bacalso

CEBU, Philippines - Dul-an 20 ka mga tawo ang nangaangol sa nahitabong aksidente sa dalan N. Bacalso kagahapon sa hapon sa usa ka convoy sa maghatud og minatay padung sa Queen City Memorial Garden human giingong nakatagpilaw ang drayber sa Kaohsiung Bus sa Cebu City Hall.

Usa sa mga sakay sa maong bus mao si Loy Jurado, nga contributor sa Banat News uban sa iyang mga apo ug pag-umangkon.

Alas 3:07 sa hapon gidumbol sa Kaohsiung Bus ang nag-una niining lima ka sakyanan diin usa sa mga nagsakay sa gidumbol nga mga sakyanan mao ang asawa ni Bokal Julian Daan nga si Yolanda “Yolly” Daan diha sa Dalan N. Bacalso sa eskina sa dalan Tres De Abril ning dakbayan sa Sugbo.               

Ang imbestigador nga si PO2 Edgardo Becoy sa Traffic Group mibutyag sa Banat News nga 16 ka tawo ang kompirmadong nangaangol sa maong aksidente.

Matud pa ni Becoy nga ang Kaoshiong Bus kalit nga mihunong human ang Toyota Revo nga adunay plakang WJT-880 gikatahong mikalit og hunong gani ang sakay niining siyam ka tawo ang lakip sa naangol.

Human nadumbolan ang Revo nahandos usab kini sa multicab nga adunay plakang GRL-433 ug ang multicab midumbol usab sa Mitsubishi Montero nga maoy gisakyan ni Daan hinungdan nga nadumbol usab kini sa nag-una nga Hyundai nga gisakyan sa mga madre ang maong van sa mga madre nakadumbol pa og awto.

Dugang pa ni Becoy nga ang mga sakyanan gikan sa Lawaan 1 dakbayan sa Talisay ug maghatod  unta kini og minatay nga ilang ilubong sa Queen City Garden nga nahimutang diha sa North Reclamation.

Sa pakighinabi sa Banat News sa driver sa Kaohsiung bus nga si Bryan Quimada, mibasol sa kalit nga paghunong sa gisundan niyang sakyanan.

Gihimakak ni Quimada nga kusog ang iyang padagan sukwahi sa unang migawas nga report.

Si Daan kinsa nahinabi sa The Freeman, igsuong pamantalaan sa Banat News miingon nga ang iyang drayber nga si Rosellier Ejercito nakabantay nga kusog ang dagan sa bus. Nasamad ang tabon-tabon sa mata ni Daan human ang ilang sakyanan nalahos sa center island. Wala mokuyog si Bokal Daan sa sakyanan  apan kauban ni Yolly ang iyang mga higala sa maong sakyanan.

“Kung wala pa to naliwag, aw wa ta kahibalo simbako lang. Sagdi nalang ang sakyanan pero grabe kaayo og damage. Di na maabli ang luyo nga pultahan sa tuo nga bahin, ang hood naukab, nabuak ang bildo. Di nako ma-imagine uy,” matud pa ni Yolly kinsa wala na dad-a pa sa tambalanan human sa hitabo.

Matud pa niya nga ilaha untang ihatud ang namatay nilang higala nga usa ka lay minister sa San Jose Parish Church diha sa Tabunok ngadto sa maong sam-ang niadtong tungora.

Traynta minutos una pa ang maong aksidente, naangol ang usa ka fashion designer human natagak ang iyang sakyanan nga usa ka Hyundai Tucoson nga adunay plakang YHS-364 sa pangpang diha sa barangay Busay ning siyudad.

Gisubay pa karon sa mga imbestigador kung asa nga tambalanan gidala si Philip Tampus ug ang usa ka wala pa mailang kauban niini.

Matud pa sa traffic enforcer nga si Roderick Plaza dihang nahinabi sa Banat News nga iyang naabtan ang sakyanan nga natibugsok ug napiit ang dulong niini ngadto sa usa ka kanal human matagak gikan sa usa ka sikat nga resort sa maong lugar.

Gibana-bana ni Plaza nga mokabat ngadto sa 45 ka tiil ang gilawmon sa natagakan sa sakyanan ni Tampus.  Dugang pa ni Plaza nga ang kaila nalang ni Tampus ang mitug-an kaniya nga gikuha na sa Emergency Medical Service ang sakay sa sakyanan. (BANAT NEWS)