Wa ilhi ang mipusil patay sa driver
CEBU, Philippines - Patay ang usa ka 33-anyos nga drayber sa habal-habal human kini pusila sa duha ka wala hiilhing lalaki nga nagsakay og usa ka motorsiklo didto sa national highway sa barangay Cansaga, lungsod sa Consolacion kagahapon sa alas 5:10 sa buntag.
Ang biktima giila sa mga polis nga si Jerod Ballera, lumad nga taga Ilo-ilo, ug nagpuyo sa barangay Jugan sa maong lungsod.
Sa imbestigasyon sa kapolisan nasuta nga sa wala pa mahitabo ang insidente si Ballera naghatud og pasahero gikan sa Jugan paingon sa Cansaga.
Dihang mobalik na ang biktima kalit lang kining gipusil sa nahisgutang mga lalaking nga walay igong hinungdan.
Si Inspector Socrates Medillo, deputy chief sa Consolacion Police Station nagkanayon nga wala nila mapiho kung asang dapita ang samad pinusilan sa biktima tungod kay dili sila pweding mohiling niini.
Matud niya nga ang biktima gikarga sa ambulansiya sa Consolacion District Hospital paingon sa tambalanan apan gideklara kini sa crew sa ambulansiya nga patay na.
Matud usab ni Medillo nga ang pamilya sa biktima bag-o lang kining namuyo sa Jugan.
Gipaladman pa nila ang ilang imbestigasyon sa maong hitabo aron mapiho ang motibo sa pagpatay ug mailhan ang mga kriminal. (BANAT NEWS)
- Latest
