Sunog sa Duljo katorse ka balay naugdaw

CEBU, Philippines - Naputol ang pamahaw sa mga molupyo sa Santa Cruz barangay Duljo Fatima human miulbo ang dakong kalayo nga milamoy og katorse ka mga balay pasado alas 9 sa buntag kagahapon.

Ang maong sunog, mihurot og lamoy sa katorse ka panimalay apan ang duha niini wala kaayo magrabihi susama sa dose nga nahurot og kaon sa kayo.

Gibana-banang mokabat sa P130 mil nga kantidad sa danyos ang maong sunog nga nakontrolar sulod lang sa 15 minutos ug giisa kini ngadto na sa 3rd alarm.

Sa pakighinabi sa Banat News ni Cebu City Fire Investigator SFO1 Lowel Opolintisima nga sa ilang nakuhang impormasyon nagsugod ang sunog sa kwarto sa anak ni Teresita Alsola nga si Ryan.

Matud pa ni Opolintisima nga ila pang ipatawag si Ryan aron sutaon ang hinungdan niini.

Apan pagduda ni Opolintisima nga posibling adunay na-overheat nga appliances o ba kaha nadaot na nga mga wirings sa lawak niini.

Sama sa ubang mga nahitabong sunog sa mga residential areas sa dakbayan, naglisod ang kabomberohan sa pagresponde tungod sa kahuot sa agianan ug  dead end pa gyud ang lugar.

Tungod niini gisumpay-sumpay na usab nila ang ilang mga firehoses aron lang makaabot sa lugar nga nasunogan.

Usa sa mga residente sa maong dapit nga si Zaldy Racaza maoy nakabantay nga nasunog ang balay nilang Alsola hinungdan nga dali siyang mipahibalo sa kasilinganan.

Mapasalamaton ra hinoon ang tanan tungod kay walay na-angol o ka baha nakalas nga kinabuhi atol sa maong insidenti. (BANAT NEWS)