Level 3 drug pusher nadakpan

CEBU, Philippines - Panimalay sa gihulagway nga level 3 drug pusher sa Pundol lungsod sa Balamban gironda sa mga sakop sa Provincial Intelligence Branch sa miaging gabii nga miresulta sa pagkasikop sa duha ka mga tawo.  Ang nadakpan mao si Jackie Gilamon alyas Bunog kinsa maoy target sa PIB tungod kay nabantog na kining mamaligyaay og shabu sa maong dapit, nadakpan usab ang iyang alalay nga si Paul Lester Campo.

Ang grupo ni Insp.  Leo Logroño mipadayag nga nakadawat sila og impormasyon kalabot sa pagpamaligya ni Gilamon og ginadiling drugas sa maong lugar.

Duha ka semanang gi- surveillance ug gipalitan og sample nga shabu ang suspek ug sa miaging gabii gilusad dayon ang operasyon batok kanila.

Si Campo maoy unang nadakpan tungod kay mao kini ang moatubang sa mga mamalit og shabu samtang wala gihapon makadagan pa si Gilamon nga diha sa sud sa iyang balay atol sa pag-abot sa mga polis. Si Gilamon miangkon sa salaod nga nahimo ug miangkon usab nga iyaha ang onse ka putos nga gituohang shabu ug armas nga kalibre .45 pistola. Si Campo mihimakak nga usa siya ka pusher apan miangkon siyang tiggamitan siya og shabu.

Ang duha gipasakaan og kaso kagahapon sa mga sakop sa PIB. (/EIM) (BANAT NEWS)