PhilHealth migahin og P 1 bilyon sa iyang “Z” package program
CEBU, Philippines - Gipangandaman sa Philippine Health Insurance Corporation (PhilHealth) og P1 bilyon nga budget ang ilang “Z†package program.
Matud pa ni Dr.Alvin Roxas, Transplant Surgeon sa Renal Center sa Vicente Sotto Memorial Medical Center (VSMMC) nga anugon kaayo ang maong budget tungod kay wala pay P20 milyones ang nagasto sa PhilHealth hangtud karon.
Miingon si Roxas nga naggumikan kini sa ka-inosente sa mga miyembro sa PhilHealth kinsa wala magpakisayud ning maong programa.
Matud pa niya nga dako kaayo og kaayohan ang mga miyembro sa Cebu media niini.
Si Roxas kinsa espesyalista sa pag-ilis og renyon nga guba o masakiton miingon nga angay mopahimus ang mga miyembro sa PhilHealth kinsa masakiton og kidney niining Z program nga ilang gitanyag.
Nasayran nga may P600,000 ang gahin sa PhilHealth alang sa kidney transplant.
Kini nagpasabot nga kun ang magasto sa magpa-kidney transplant og P1milyon, bali nalang og P400,000 ang abagahon sa pasyente tungod kay libre naman ang P600,000 niini gikan sa PhilHealth.
Gawas sa kidney, gilakip usab sa maong programa ang breast cancer ug uban pa.
Si Roxas nagkanayon nga ang sakit sa renyon mag-agad sa magasto sa pasyente.
Apan alang kaniya nga ang gikinahanglan mao nga may tukmang tawo ilabi na ang paryente sa usa ka pasyente nga maoy modonar sa iyang renyon ngadto sa magpailis niini.
Kini tungod kay di kaayo lisud ang pag-eksamin sa mga doktor sa mga renyon sa mga tawo nga paryente ra sa pasyente. Sa samang higayon gibutyag ni Roxas nga mas makapahuway ang usa ka pasyente sa sakit sa renyon gikan sa iyang kahasol kun magpailis sa iyang masakitong renyon.
Kini kun itandi sa sa magpa -dialysis kansang gidugayon molungtad lang sa duha ngadto sa tulo ka tuig.
Gani matud pa ni Roxas nga ang iyang mga gipang-ilisan og renyon mibalik na sa normal ang ilang panglawas ug gani mosuroy kaniya usahay aron sa pagpangumusta.(/WC) (BANAT NEWS)
- Latest
