Dispatser gipusil tuhod naigo

CEBU, Philippines - Nalup-og ang usa ka dispatcher  human  kini  pusila  sa duha ka wala  hiilhing  lalaki  nga  nagsakay  og  motorsiklo sa dalan M. Logarta, barangay Subangdaku, dakbayan sa Mandaue  kagahapon sa  alas 11:00 sa  buntag. Ang biktima mao si Junifer Otiano Lequin, 36 , ulitawo  ug dispatser sa PUJ ug taxi  sa maong  lugar.

Si PO2 James Galo sa kapolisan sa Presinto 2 sa Mandaue City Police Office (MCPO) nga nagbase sa barangay Subangdaku mibutyag   sa Banat News  nga sayo pa sa buntag nga nag-standby ang biktima   ug  nagpaabot og mga taxi o PUJ nga molabay sa maong dapit.

Dugang pa niya nga   sa pag-abot  na  og  alas  11:00 ang takna  kalit  lang  miabot  ang   usa  ka  motorsiklo  nga  gisakyan  sa duha  ka lalaki  nga  pulos  nagsul-ob  og  helmet.  Matud pa ni PO2 Galo nga ang backride   maoy  nanaog  gikan  sa motor  dayon  mipusil  sa biktima. Si PO2 Galo miingon nga human maigo  sa tuhod  nalup-og  sa  yuta  ug  gibiyaan  lang  kini  sa   pistolero  kinsa  misakay og  balik  sa motorsiklo  dayon  pahilayo sa  maong  lugar.

Dugang pa niya nga ang biktima nga nakapangayo og panabang sa mga tawo sa maong dapit nadala ngadto sa Mandaue City Hopital. (/WC) (BANAT NEWS)