Garcia di pa makalingkod

CEBU, Philippines - Dili pa makalingkod   og  balik  sa katungdanan  si  Gobernador Gwendolyn Garcia  gawas  kun  makapadala  na  siya  og  pormal  nga suwat  pahibawo  ngadto  sa hunta  probinsiyal.

Mao kini ang  hisgot  kagahapon  ni  manlalaban Ayis Nogra, ang legal  counsel  sa  Department of Interior  and  Local  Government (DILG)-7.   Si Garcia nahiabot  sa iyang  buhatan  sa alas 3:00  pasado  kagahapon.

Kini  human  ablihi  ang  iyang  buhatan   kagahapon  sa  alas 9:20 sa buntag human usab mapupos ang 6 ka bulan nga suspension order  kaniya   gikan  niadtong  Decembre 19, 2013 hangtod  niadtong  adlaw’ng Lunes. Apan wala mopatim-aw si Garcia  kagahapon  sa buntag  sa iyang buhatan  ug igo lang kining nagpadala sa iyang chief of staff nga si Beth Francia  ug ubang kawani nga si Ronald Canopio isip representante niya.     

Ang pagbukas  sa iyang  buhatan, gitambungan  sa mga representante usab gikan sa buhatan ni Vice Governor Elect Agnes Magpale, DILG-7  legal counsel nga si  Nogra.      

Si Magpale unang mitataw kagahapon sa buntag atol sa interview sa Bantay Radyo nga wala na gyud unta siya mamirma pa og mga dokumento ingon man tseke nga magrepresentar sa buhatan isip acting governor  tungod kay napupos na man ang suspension order ni Garcia. Si director Villacorta nibutyag  usab atol sa interview sa Bantay Radyo nga mahimong gamiton ni Garcia ang iyang  nahabiling sick leave ug leave credits niining nahabilin  nga 11 ka adlaw sa dili pa mapupos ang iyang termino hangtod sa  Hunyo 30.    

Dugang ni Villacorta nga kun ganahan pang mo-asumir sa nahabiling termino si Garcia bugtong himoon niini mao lang ang pagpahibawo sa mga department heads ug board members.      

Nasayran nga si Garcia miadto   sa kaulohan kagahapong adlawa tungod sa hearing sa iyang kaso sa Sandiganbayan  nga  may labot sa kontrobersyal nga pagpalit sa Balili Property.      

Si Garcia  inigka human sa iyang termino karong Hunyo 30, sa pagka- gobernador, mo-asumir na usab kini isip kongresista sa  tresero distrito sa Sugbo hulip sa iyang manghod nga si outgoing congressman Pablo John Garcia. Si PJ Garcia  maoy mikandidato  sa  pagka-gobernador  ubos sa One Cebu Party sa miaging eleksiyon ug gipilde ni Governor elect Hilario “Junjun” Davide III sa Liberal Party (LP). (BANAT NEWS)