Polis utok sa kidnap

CEBU, Philippines - Polis  maoy  giingong mastermind sa “kidnap for ransom” sa usa ka  Overseas Filipino Worker  (OFW) niadtong Dominggo sa alas 9:00 sa gabii sa Rabaya St.,  dakbayan  sa  Talisay  ang gilakip sa pagpasaka og kaso kagahapong adlawa.   

Matud pa ni Sr. Supt. Mariano Natuel Jr.,  hepe  sa Cebu City Police Office (CCPO) nga si PO2 Lee Colina, nga nadestino sa Police Station 10 ug sa Special Weapons and Tactics (SWAT) apan natangtang kini tungod sa iyang pagkahimalta  ug kanunay  nga pagka-late sa trabaho.      

Dugang pa ni Natuel nga niadtong Hunyo 7 ning tuiga giingong “drop from rules” na si Colina sa iyang pagka-polis  nga  nagpasabot nga hingpit na siyang gitangtang sa iyang serbisyo isip polis.  Giingong gikan niadtong buwan sa Abril 12, hangtod na niadtong  Mayo 3, ning tuiga wala nay tunga-tunga sa iyang assignment si Colina hinungdan nga gipaubos kini sa imbestigasyon sa ilang hepe nga si Chief Insp. Chuck Barandog.      

Ang maong imbestigasyon, miabot ngadto  sa buhatan ni Natuel ug mipahigayon usab sila og imbestigasyon apan wala gayud nila igkita ang maong polis hangtod nga naabot ang maong order.      

Nasayran  nga  niadtong buwan sa Enero o Pebrero, gi-alarma usab ang maong polis tungod sa giingong reklamo niini sa pagpangulata sa iyang kapikas.      

Sa wala pa mibalhin sa Police Station 10 si Colina, nadestino una kini sa buhatan sa SWAT apan giingong gibalhin usab kini tungod gihapon sa sakit niining kanunay’ng mo-absent nga dili mananghid  o kanunay  nga  maulahi  pagtambong  sa  trabaho.        Sa imbestigasyon sa mga sakop sa National Bureau of Investigation, ilang nasayran nga si Colina maoy utok sa kidnapping group nga mikidnap  ni Rene Boy Agraviador  niadtong  Dominggo  sa gabii. Hinungdan nga kasamtangang  gipangita nila kini ug gipasakaan   usab  og  kasong kidnapping for ransom.      

Samtang lakip usab nga napasakaan mao sila  si  Wane Tiano, kinsa namatay atol sa shootout, Ronilo Roble, ug laing duha ka wala pa mailhing lalaki nga kuyog sa maong grupo.       Ang hepe sa kapolisan sa Police Regional Office-7 chief Supt. Marcelo Garbo, mipadayag nga ang lihok sa duha iyang mahulagway nga localized  lamang hinungdan nga ang publiko dili  angayang maalarma.  (BANAT NEWS)