Pamilya sa bana nga gipatay sa asawa naglibog kun mokiha

CEBU, Philippines - Pamilya sa banang gipusil patay sa iyang asawa managlahi og baruganan kung pasakaan ba o dili ang asawa nga mipatay sa ilang igsuon, samtang anak sa managtiayon kusganong mibabag niini.

Matud pa ni Lapulapu City Homicide Chief  Sr. Insp. Zenaido Partorfide andam na unta ang kasong Parricide nga ilang ipasaka batok ni Editha Sollano ang asawa nga mipusil patay sa iyang bana nga si Samuel Sollano atol sa pagsaulog sa Father’s Day niadtong Domingo sa gabii.

Apan nagproblema ang kapolisan karon gumikan sa hukom sa kabanay ni Samuel diin tulo ka mga igsoon niini ang dili buot mopasaka og kaso ug tulo usab ang nangusog sa pagpasaka sa maong kaso.

Matud pa ni Editha (ang suspek) iya na lang gitugyan ngadto sa iyang mga bayaw ang paghukom kung pasakaan siya og kaso human kini mangayo og pasaylo ngadto kanila ug sa iyang mga anak sa pagpatay sa iyang bana (Samuel).

Ang 24-anyos nga kamaguwangang anak nga lalaki ni Editha nga si Frederick mipadayag nga dili siya  mopasaka og kaso batok sa iyang inahan tungod kay duna pay walo niya ka mga igsuon ang magkinahanglan sa ilang inahan.

Ang kinamanghurang anak niini nagpangidaron pa og kapin usa ka tuig ug nagtutoy pa kini sa suspek. Miesplikar si Frederick nga kung mabilanggo ang iyang inahan duha na ang mawagtang kanila.

Dili usab siya mosugot nga ipanghatag ang iyang manghod sa iyang mga uyoan ug iyaan bisan pa sa maong insidente diin misabot siya sa nahimo sa iyang inahan ngadto sa ilang amahan. Wala usab matigayon ang autopsy sa lawas ni Samuel gumikan kay mipirma si Frederick ug ang tulo ka iyaan niini nga sila si Maria, Mising ug Beth nga dili na lang ipa-autopsy ang patay’ng lawas ni Samuel. Apan sila si Ricardo, Epefanio ug Rogelio mga igsoon sa biktima mipadayag sa ilang tinguha sa pagpasaka og kaso batok ni Editha alang sa hustisya sa ilang igsoon.

Tungod niini si Insp. Pastorfide mihatag og 36 ka oras sa banay sa namatay kung mopasaka sila og kaso o dili, apan giklaro niya nga bisan si kinsang pribadong tawo mahimong mopasaka sa kaso tungod kay public crime kini.

Apan kun dili sila magkasinabot hayan iyahang pabuhian si Editha. (BANAT NEWS)