Nabiktima sa budol ginunting nga papel ang sud sa medyas

CEBU, Philippines - Usa ka 26-anyos nga babaye ang nawagtangan sa iyang salapi ug singsing ngadto sa usa ka gidudahang miyembro sa budol gang samtang siya naghuwat og PUJ diha sa may UN Avenue sa dakbayan sa Mandaue niadtong Martes sa hapon .

Si Louella Cantuja na-shock sa dihang pag-abli niya sa medyas nga gibilin ngadto kaniya  bugti sa iyang wedding ring ug P560 niya nga salapi pulos na lang kini papel nga ginunting.

Ang maong medyas gibilin kaniya sa babayeng nagpatabang kaniya pagpangita asa makaabang og trak de karga.

Ang modus sa grupo, dunay mopatabang pagpangita og maabangang sakyanan ug dunay tawong mosalga sa estorya nga magpakaaron-ingnong tultolan ang nangita og sakyanan, apan magbahin sila sa komisyon uban sa biktima.

Kinahanglan lang nga mohatag og collateral ang isi’g ka habig ug isulod kining tanan sama sa kwarta, cellphone, alahas ug uban pang mahalong butang sa usa ka sudlanan nga dunay sulod nga binandol nga“kwarta”ug ibilin kini ngadto sa biktima.

Ang duha mamiya aron adtoon ang trak nga abangan apan di na sila mamalik pa, ang biktima tungod sa kadugay sa pagpaabot matintal nga moabli sa sudlanan ug diha lang niya mahibaw-ing mga ginunting nga papel ang “kwartang” gibilin kaniya ug wala iyang mga kabtangan.

Ang kapolisan mipahimangno kabahin niini nga estilo sa pagpangilad nga sagad ang biktimahon kadtong mag-inusarang biktima. (BANAT NEWS)