Rama ‘gisungog’ sa konseho

CEBU, Philippines - Daw gisungog g’yud sa mga sakop sa konseho sa dakbayan sa Sugbo si Mayor Michael Rama kay ilang gipahalipayan si Senior Superintendent Mariano Natuel tungod sa pagkatudlo na nga direktor sa Cebu City Police Office (CCPO).

Si Konsehal Jose Daluz III nga alyado ni Mayor Rama wala moapil sa pagpahalipay ni Natuel tungod kay gikwestyon nila ang lakang sa kadagkoan sa Camp Crame nga pagtudlo ni Natuel isip direktor nga wala’y mag-agi sa mayor.

Matud ni Mayor Rama nga dili unta angay’ng maghimo og lakang ang konseho sa dakbayan nga walay pagtoon sa balaud sanglit tabla ra nga gisuportahan nila ang sayop sa kadagkoan sa kapolisan.

Gitug-an ni Rama nga nakabasa na siya sa kamandoan nga giluwatan sa Police Regional Office-7 Personnel Division nga nagtudlo ni Natuel isip city director gikan sa pagka Officer-in-Charge (OIC) sa CCPO.

Matud ni Rama nga gipatun-an na niya sa iyang mga abogado ang posible nga paghimo og tukma nga lakang-legal tungod kay ang gihimo sa kadagkoan sa kapolisan nga pag-promote ni Natuel kaniadtong Mayo 10 kalapasan sa Election Ban.

Gawas pa matud ni Rama nga wala tumana sa kadagkoan sa kapolisan ang lagda nga gilatid sa Section 63 sa Republic Act 8551 nga naglatid nga ang mga mayor maoy mopili kinsa ang itudlo nga hepe sa kapolisan sa ilang dapit.

Ang katungdanan sa kadagkoan sa kapolisan mao ra ang pagpadala og listahan ngadto sa mayor sa mga opisyal nga iyang kapilian aron itudlo sa maong pwesto.          

Gusto ni Rama nga si Senior Superintendent Noli Romana maoy mamahimo nga direktor sa CCPO, apan si Romana gitudlo na nga direktor sa Negros Oriental Provincial Police Office. (BANAT NEWS)