Masakito’g kidney misaka matag tuig

CEBU, Philippines - Gibutyag  sa mga  doktor   ang  pagsaka  sa sakit nga  kidney tungod  sa pag-umento  karon  sa nagkalainlaing matang sa pagkaon  ug  ilimnon.

Matud  pa  ni Dr. John Li, Nephrologist sa Chong Hua  Hospital  kagahapon nga usa  sa labing epektibong  tambal  niini  mao  ra ang  paglikay  sa maong  mga  pagkaon.

Si Li  maoy  pinasidunggang  dinapit  sa Kapihan sa PIA  nga  gipalanog  sa DYMR Radyo  ng Bayan  Cebu  kinsa miingon  nga  ang  pag-abot  sa  mga  fast foods chain  dinhi sa Pilipinas  naghatag  og  bintaha  ug  disbintaha  sa mga  Filipino.

Kini  tungod  kay  makabusog  ang  maong  mga  pagkaon  ug  makatabang  alang  sa pagpauswag  sa  kalidad  sa pagpuyo  sa  kadaghanan.

Samtang  ang  dimalas  nga  idulot  niini  mao  ang  pagkaguba  sa kidney  sa masubrahan  sa maong  mga  pagkaon    ilabi  na sa mga  kabataan  nga  nag-eskuyla.

Apan  sa  maong  tulumanon  gibutyag  ni Li  nga gumikan sa   modernong  mga  pagkaon,  misaka  usab  ang  gidaghanon  sa  mga  pasyente  sa kidney.

Nasuta  ni  Li  nga  ang  tawong  masakiton  og  kidney,  may  tulo  ka butang  ang     angay niyang  hinumdoman.

Kini  mao  ang  pagpa-check-up  matag  tuig   sa ihi, ipa-check–up  usab  ang  blood pressure  ug  ang pag-check-up  sa  blood sugar.

Miingon  si  Li  nga  kining  maong  mga  butanga  maoy  maghatag  og  hustong  desisyon  sa tawo  nga  siya  wa mag-atubang  sa kakuyaw  kun  normal  ang tanang  resulta niini.

Apan  kun  abnormal  anha  na  makadesisyon  ang tawo  sa  kakuyaw  nga  iyang  giatubang sa kinabuhi.

Ang  record  sa masakiton   og  kidney  misaka  sa  585 sa miaging 2012 gikan s a 400 kapin sa tuig  2011. (BANAT NEWS)