Midangop unta sa polis kay gikulata sa bana gidakop tungod sa kaso sa pornograpiya

CEBU, Philippines - Usa ka ginang nga midangop unta sa buhatan sa kapulisan aron magpatabang tungod sa pagkulata kaniya sa iyang kapuyo ang gipaslak sa prisohan human masuta nga duna kini warrant of arrest tungod sa kasong human trafficking (cybercrime).

Nahitabo kini niadtong alas 5:15 sa hapon sa adlaw’ng Lunes human mireklamo sa buhatan sa Cordova Police Station sa lungsod sa Cordova si Marilou Abano Tabada, 37, dalaga apan dunay kapuyo ug dunay tulo ka mga anak nagpuyo sa Poblacion Cogon, Cordova.

Ang iyang gireklamo og pagpangulata mao ang iyang kapuyo nga si William Sumalinog kinsa dihang giadto sa kapolisan wala na diha sa ilang balay. Matud ni PO3 Denis Camunay sa Cordova Police dihang nahinabi sa Banat News miabot sa ilang buhatan si Tabada kay magpatabang  apan ilaha kining namay-ungan nga dunay warrant of arrest hinungdan nga siya gidakop.

Nasuta nga duna kini kasong Qualified Trafficking in person (cyber crime) duha ka tuig na ang milabay nga pirmado ni Lapulapu City RTC Judge Toribio Quiwag ug walay gi-rekomendar nga piyansa alang sa temporaryong kagawasan niini.

Bisan pa man niini, miresponde gihapon ang mga polis sa iyang reklamo apan pakyas sila pagsikop sa bana niini.

Matod ni Camunay bag-ohay pang nanganak ang suspek sa iyang 2-anyos nga kamanghuran dihang kini nadakpan kaniadto ug gipasakaan og kaso. (BANAT NEWS)