Brgy. Tabunok sa Talisay taas ang krimen

CEBU, Philippines - Ang barangay Tabunok, dakbayan sa Talisay maoy   labing taas og krimen, matud ni Superintendent Elmer Lim, officer-in-charge sa Talisay City Police Station kagahapon.

Ang Talisay gilangkuban  sa 22 ka mga barangay diin ang  nag-unang  lima  ka  mga barangay nga adunay daghang  krimin  base sa ulahing talaan sa kapolisan sa siyudad , mao ang Tabunok nga dunay 67 ka mga krimen; Poblacion, 22; San Isidro, 21; San Roque, 17 ug Lawaan 2, nga  may 14 ka mga krimen.

Ang maong gidaghanon   natigom  sukad  niadtong Enero hangtud sa buwan sa Mayo niining tuiga.

Matud ni Lim nga ang maong mga krimen gilangkuban  sa “index crime” o “crime against property and person” diin ubos niini mao ang kawat ug tulis.

Ang Tabunok maoy labing sentro nga barangay sa Talisay diin naa mahimutang ang mga patigayon ug nahimong  tapokanan  sa mga tawo.

Nasayran  nga kung asa dapita   ang tapokanan sa daghang mga tawo naa usab ang mga krimen.

Kasagaran sa mga insidente sa pagpangawat mahitabo  sa lawom na kaayong gabii hangtud sa kaadlawon.

Matud usab ni Lim nga ang kapolisan nagkinahanglan usab og tabang sa katawhan pinaagi sa pagmatngon aron dili sila mabiktima sa mga kriminal.

Sa kinatibuk-an gikan niadtong buwan sa Enero hangtud sa Mayo niining tuiga, ang siyudad sa Talisay adunay mikabat  sa  88 ka mga kaso sa robbery, 90 sa theft, usa ka kaso sa rape, walo ka murder, 55 sa  Violation Against Women and Children.

Kasagaran  sa  nasikop  sa  kalapasan  batok sa babaye  ug  kabataan  mao ang pagpanapat  sa bana ngadto sa ilang asawa, samtang  pito  usab  sa drugas. (BANAT NEWS)