Dasmag motor vs. pick up 2 angol

CEBU, Philippines - Miliki  ang  bagulbagol  ug  kritikal ang kahimtang sa  usa ka  ulitawo human  mapasok  ang  iyang  gimanehong  motorsiklo  sa ilawom sa usa ka dakong  sakyanan  nga  iyang  kasugat  didto sa highway sa barangay Taytay, sa siyudad sa Danao niadtong Biyernes sa alas 10:00 sa buntag.

Ang biktima nga  nagmaneho sa motorsiklo nga walay plate number mao si Ryan Mata Uy, 19, ulitawo ug nagpuyo sa Sityo Libon, barangay Guinsay, Danao.

Samtang ang drayber sa Toyota Town Ace pick up mao si Jose Colonia Bejoc,hingkod, nagpuyo usab sa maong lugar.

Si PO1 Rommel Costan sa Traffic Group sa Danao City   Police  Station  mibutyag  sa   Banat News  nga  ang motorsiklo paingon  sa norte nga dereksiyon. Sa pag-abot sa maong lugar mi-overtake kini sa nag-unang  Ceres Bus ug naatol nga maoy pagguho sa gikasugat nga sakyanan ug didto  napisok  kaayo  niya  ang   pagdasmag  niini.

Tungod sa kakusog sa   iyang  dagan,  napaslak  siya  sa  ilawom sa sakyanan  ug didto nalabay ang biktima.

Maayong pagkabunal  ang ulo  niya  sa semento nga karsada ug naangol usab ang drayber sa sakyanan. Daling gipanghatud ang duha sa Danao City District Hospital tungod sa grabing kahimtang sa drayber sa motor nga gihulagway pang naliki ang ulo.

 Ang duha gi-refer  usab dayon sa tambalanan  sa dakbayan sa Sugbo ug wala pa  mahibaw-i ang labing uwahing kahimtang sa drayber sa motorsiklo.  (BANAT NEWS)