PO2 Estremos ilubong karong adlawa
CEBU, Philippines - Ilubong na karong adlawa ang polis nga si PO2 Gerlito Estremos nga giingong gikulata ug gipusil patay sa duha ka lalaking iyang gisita diha sa may dalan P. Del Rosario niadtong Sabado sa kaadlawon.
Kagahapong adlawa gidala ang haya ni Estremos sa Police Regional Office aron usab mahatagan og higayon ang kaubanan niining gustong makakita kaniya sa kataposang higayon.
Ilubong si Estremos karung adlawa sa Calamba Cemetery.
Ang asawa ni Estremos nga si Elmera nagpasalamat sa mga tawong miduyog sa ilang kasub-anan ug sa awtoridad nga mitabang sa pagdakop ug ang pagkapatay sa usa sa mga suspek.
Ang prime suspect nga si Ian Canseco napasakaan na og kaso sa korte samtang napatay usab ang giingong kauban niining si James Flores human giingong misukol sa kapolisan diha sa barangay Tisa.
Ang National Police Commission gikatahong mipasalig nga maoy motabang sa pagpatungha sa mga anak ni Estremos.
Samtang gipadayag usab ni Elmera nga wala pa niya makuha ang kwarta nga hinabang pinansyal gikan sa Philippine National Police.
Ang kapolisan, padayon pa sa ilang gihimong imbestigasyon kun aduna bay nagpaluyong mastermind sa kamatayon sa maong polis. (BANAT NEWS)
- Latest
