Mga bata sa Brgy. Ermita nahipos tungod sa bitin

CEBU, Philippines - Gihakop og kahadlok ang mga bata nga nagpuyo diha sa nasunogan nga dapit sa Sitio Bato, Barangay Ermita human sila makakita og dako kaayo nga bitin nga mora’g paa sa bata ang gidak-on.

Usa ka lumulopyo sa Sitio Bato mitug-an sa Banat News nga una nila nga nakit-an ang daku kaayong bitin nga mibalikis sa haligi sa latayanan nga ilang gihimo nga anaa giugbok sa dagat.

Gisuwayan unta nila’g bunal ang bitin apan sanglit nag-atras-atras sa kahadlok ang buot mobunal ang bitin nakamaneho sa pag-ambak sa dagat ug hangtud karon wala pa madakpi.

Gituohan nga ang maong bitin diha ra magtago sa ilawom sa kabalayan o kaha sa mga dagko nga kanal ug tungod sa kusog kaayo nga uwan niadtong pipila ka adlaw, nabanlas kini ngadto sa dagat.

Ang dapit sa Sitio Bato, Ermita sagad unta kaligoan sa mga bata nga nagpuyo sa mao nga lugar apan human nila makit-i ang bitin gidid-an sa mga ginikanan ang ilang mga anak sa pagkaligo sa dagat. (BANAT NEWS)