Frenchman nagdala’g mga dalagita sa hotel

CEBU, Philippines - Nagtingkagol sa karsel ang usa ka French kini human gireklamo tungod sa pagdala niini og mga minor de edad nga mga babaye sa usa ka uptown hotel sa dakbayan sa Sugbo kagahapon sa hapon.

Ang nasikop mao si Alex Lefur, 43, kinsa naaktuhan nga dunay gikaubang duha ka mga batang babaye sa sulod sa lawak niini sa 6th floor sa hotel.

Sa pakighinabi sa Banat News sa hepe sa Anti-Cybercrime Group Central Visayas, Senior Inspector Michael Vertudazo, kini mibutyag nga nangayo og tabang kanila ang Children Legal Bureau (CLB)  niadtong adlaw’ng Biyernes kalabot sa suspek nga adunay mga dala-dalang minor de edad.

Pasado alas-2 kagahapon nakompirmar sa mga sakop sa ACG  uban sa mga sakop sa CLB ug Department of Social Welfare and Development  nga magdalahan og mga batang babaye ang maong langyaw sud sa hotel.

Matud pa ni Vertudazo nga sa ilang gihimong surveillance, ilang nasayran nga kada abot ni Lefur sa maong hotel aduna gyud kini dalang mga babaye nga susama sa menor de edad.

Hinungdan nga ang mga gwardiya sa maong hotel, gimandoan nga dili pasudlon ang mga babaye nga kuyog ni Lefur ilabi na nga ila kini nga gidudahang menor de edad.

Subay sa balaod bawal ang si bisan kinsang hamtong magdala og mga minor de edad sa hotel gawas lang kung ilaha silang mga anak.

Nakuha gikan kang Lefur  mao ang iyang laptop ug cellular phone nga gituohang posibleng makuhaan sa kapolisan og ebidensya.

Wala motug-an kanila ang langyaw kun nag-unsa kini sulod sa hotel kauban ang mga batang babaye. Ang langyaw giingong upat na ka adlaw nga nagpuyo sa maong hotel ug gibana-banang kapin napulo na ka batang babaye ang nadala niini sa iyang lawak.

Giingong usa sa mga na-rescue sa kapolisan nga babaye nagpangidaron og 14-anyos samtang ang usa niini nangangkong nag-edad na og 18-anyos apan ila pa usab kini nga eberipika.

Ang menor de edad i-turnover ngadto sa buhatan sa Department of Social Welfare and Development. (BANAT NEWS)