CIB andam sa kiha sa pamilyang Flores

CEBU, Philippines - Ang hepe sa City Intelligence Branch sa Cebu City Police Office ang nihangop sa planong pagpasaka og kaso sa pamilya sa ilang napatay nga si James Flores, ang ikaduhang suspek sa pagkulata ug pagpusil patay kang PO2 Gerlito Estremos.

“Girespeto nato ‘na. Normal na man ‘na sa among serbisyo,” padayag sa hepe sa CIB nga si Chief Insp. Romeo Santander.

Si Gloria Mondigo, inahan ni Flores kusganong mihimakak nga makamaong mo-drive og motor ang iyang anak. Gikasagmuyo usab niya ang kabangis pamaagi sa pagpatay sa mga polis ngadto sa iyang anak base sa lima ka samad pinusilan nga naangkon niini.

Si Santander midugang nga judgment call na ni Insp. Keith Allen Andaya ug PO3 David Najara, Jr. ang pagpusil kang Flores, kinsa giingong misuway og pusil kanila hinungdan sa shootout sa Barangay Tisa niadtong Miyerkules sa gabii.

Gipahibalo usab ni Santander nga narekober na nila ang motorsiklo nga giingon nga maoy gimaneho ni Flores atol sa pagpatay kang Estremos. Ang motor, narekober gawas sa usa ka giabandonar nga balay sa Barangay Talamban niadtong Huwebes sa udto.

Ang CCPO padayon pa karon og imbestigar sa nahitabong pagpatay kang Estremos kini tungod kay nagtuo sila nga duna pa’y laing suspek nga nalambigit sa hitabo ug duna’y mas lawom pa nga hinungdan nganong gipatay ang maong pulis. " Naa tay na link but mao lagi its early to tell pa man, but as to the motive nagkaduol na gyud ta, so in due time we will tell you the motive," pasabot pa ni Santander. (Niña G. Sumacot ug Lesley Caminade/EIM) (BANAT NEWS)