Karaang bugoy gipusil naangol

CEBU, Philippines - Usa ka kanhi bugoy sa ilang lugar ang naangol human kini gipusil sa wala mailhing tawo samtang nagkugos ug naghagwa-hagwa sa iyang anak sulod sa ilang balay diha sa barangay Gunting lungsod sa Barili niadtong miaging alas 10:15 sa gabii.

Ang biktima mao si Junard Ramos, 32, kinsa giingong maldito kaniadto apan nausab human makaanak sa iyang kapuyo ug nanginabuhi isip drayber sa traysikad.

Wala pa matino sa kapolisan kung si kinsa ang mipusil sa biktima apan gidudahang iyang mga kanhi kaatraso ang mamumuno.

Matud ni PO2 Richard Cababat, imbestigador sa Barili Police Station dihang nahinabi sa Banat News naghagwa ang biktima sa iyang anak diha sa ilang kwarto dihang kalit nga mipaka ang buto sa armas ug naigo ang bukton ug agtang sa biktima.

Nasuta nga gipalusot sa mamumuno diha sa buslot sa bungbong ang sumbohan sa armas sa pagpusil sa biktima, swerteng wala maigo ang anak sa biktima. Ang gunman daling nakaikyas samtang gidala sa Vicente Sotto Memorial Medical Center si Ramos.

Ang biktima giingong badlongon kaniadto ug gipasanginlan kaniadto nga nangawat og traysikad. (/EIM) (BANAT NEWS)