Pintor gituohang giurom namatay

CEBU, Philippines -  Walay foul play ang kamatayon sa usa ka pintor nga gituohang giurom  samtang nahinanok sa pagkatulog  sulod sa bunkhouse sa construction site sa barangay Agus sa dakbayan sa Lapulapu  sa miaging  hapon.

Matud pa ni  PO1 Jomar Florentino sa homicide section sa kapolisan sa maong dakbayan nga wala’y timailhan nga gibinuangan ang namatay nga si Raymund Dorimon, hingkod , nga lumad nga taga dakbayan sa Bais ug temporaryong nagpuyo sa maong dapit.

Matud pa niya nga  ang asawa sa namatay nga si Fortunata , maoy nakadiskubre sa patay’ng lawas ni Dorimon .

Miingon  si Fortunata   nga  dihang gipukaw  niya ang  iyang  bana aron manihapon, nadiskubrehan niya nga wala  na  kini  maglihok.

Dugang pa ni PO1 Florentino nga dali nga nangayo og panabang ang asawa sa mga kaubang trabahante ug ila  kining gihatud  ngadto sa Lapulapu City District Hospital diin   gideklarar kini sa mga doktor nga patay na kini.

 Bisan kun ang kapolisan miingon nga wala’y foul play ang kamatayon ni Dorimon apan sa gihapon ang asawa nagtinguha   nga ipaubos sa autopsy   ang patay’ng lawas sa iyang bana aron  pagsuta sa tinuod  nga hinungdan  sa kamatayon  niini. (BANAT NEWS)