OB-Gyne Ward sa CCMC mi-warning sa manganak

CEBU, Philippines - Ang mga tinugyanan sa Cebu City Medical Center (CCMC) nagpasidaan nga modagsang ang mga pasyente sa ilang OB-Gyne Ward karong sunod buwan.

Ang rason niini mao nga ang OB-Gyne ward sa Vicente Sotto Memorial Medical Center (VSMMC) sirad-an sulod sa pipila ka semana alang sa “general cleaning.”  Tungod niini, ang mga babaye nga manganak nga gikan sa lainlaing mga dapit hayan magpunsisok  sa OB-Gyne ward sa CCMC. Matud ni Hospital Director Gloria Duterte nga dili sila makabalibad kun adunay mga pasyente nga modangop kanila aron anha manganak sa CCMC.

Si Duterte nagkanayon nga nakadawat na sila og abiso gikan sa mga tinugyanan sa VSMMC nga magpahigayon  sila og “general cleaning” mao nga mosira sila makadiyot sa ilang OB-Gyne ward. Dinhi sa dakbayan, ang mga kawani sa lainlaing health centers gibansay na nga moatiman sa mga manganak aron makatabang nga dili na magpunsisok ang mga pasyente sa CCMC. (BANAT NEWS)