Laing 13 ka tawo nalanag sa litson sa danao

CEBU, Philippines - Laing 13 ka tawo ang nangalanag sa litson nga ilang gikaon nga ilang napalit niadtong Domingo gikan gihapon sa tindahan sa barangay Poblacion, dakbayan sa Danao nga diin napalit ang litson nga nakalanag sa 43 ka priso sa Danao City Jail usa ka semana na ang nakalabay.

Si Assistant Danao City Health Officer, Dr. Eric Echavez, mibutyag nga ang napulo niadtong Domingo nalandig sa Danao Provincial Hospital samtang kagahapon sa buntag nadugangan kini og tulo.

 Giingong nangaon og litson ang mga biktima niadtong Domingo sa kan-anan diin napalit ang litson nga nakaingon sa pagkalibanga sa kapin sa 40 ka piniriso sa Danao City Jail sa niaging Domingo.

Ang kabanay sa binilanggo nga si Edwin Ebalya, 58, nagdala og litson sulod sa bilanggoan alang sa kasaulogan sa iyang adlaw’ng natawhan apan human sa kombira nangasakit sila ug gikinahanglan pang anhaon sa mga doktor diha sa bilanggoan aron katambalan.

Gipugngan ni Echavez ang pangan sa maong kan-anan sanglit gipaubos pa sa pakisusi ang gikaon nga litson, apan gimandoan na silang dili una mobaligya og litson gawas lang sa ilang panindang mga sud-an.

Ang Integrated Provincial Health Office nisusi usab sa nahimutangan sa lutoanan sa litson tungod kay nagduda si Dr. Cristina Giango nga hugaw ang dapit nga andaman sa litson. Dugang ni Echavez nga karong Biyernes mahibaw-an ang resulta sa pakisusi base sa gipahibawo kanila sa kadagkoan sa Department of Health. (Gregg M. Rubio/EIM)

Striker ni Chief Insp. Ylanan  gipusil patay

NI Lesley Caminade-Vestil

 Patay nang nahidangat sa tambalanan ang giingong striker sa hepe sa kapolisan sa Regional Special Operation Group, human kini gipusil sa duha ka lalaking nagmotorsiklo pasado alas-10 sa buntag kagahapon diha sa  dalan Calderon barangay Ermita. Ang biktima nailhan nga si Richard Cajegas, 39, molupyo sa dalan Salvador barangay Labangon ug giingong sulogoon ni Chief Insp. George Ylanan sa RSOG-7.

Ang suspetsado gihulagway nga nagpangidaron og 35-ngadto 40-anyos,  5’4 ngadto na sa 5’6 ang height ug itomon ang pamanit ug upawon ang buhok niini.

Sa pakighinabi sa Banat News ni PO1 Reoful Adalim, mipadayag kini nga sa ilang nakuhang impormasyon ang biktima gisugo og luto-onon alang sa ilang paniudto sa RSOG.

Apan dihang motikang na unta kini sa iyang motorsiklo aron mobalik sa kampo kalit lang nga mipatim-aw ang wala mailhing mamumuno ug walay daghang pangutana gipusil kini sa makadaghang higayon.

Matud pa ni Adalim nga ang biktima maayong pagkaigo sa makaupat ka higayon sa iyang walang bahin sa dughan ug usa niini sa nawong. Gisuwayan pa unta sa pagdala sa Cebu City Medical Center ang biktima apan giingong nakabsan gyud kini sa iyang kinabuhi.

Dugang pa ni Adalim nga tanang anggulo ila karun nga gisusi lakip ang personal nga panagbangi tungod sa pamaagi sa pagpusil nga susama og grabe ang kasuko sa gunman.

Bisan daghan ang tawong nakakita diha sa pagkahitabo, pulos sila nangambot kay nangahadlok. Nakuha sa crime scene mao ang upat ka kabhang sa kalibre .45 nga maoy gituohang gigamit sa pagpatay sa biktima. (BANAT NEWS)