One Cebu nanambong sa panihapon sa LP

CEBU, Philippines - Nanambong ang pipila ka alyado sa One Cebu Party sa usa ka panihapon nga gidalit sa Liberal Party isip pasalamat sa ilang kaubanan sa niaging eleksiyon. Ang kalihukan gipahigayon niadtong Domingo sa gabii sa White Gold House nga gipangulohan sa bag-ong napiling gobernador Hilario Davide III ug bise-gobernador Agnes Magpale.

Ang nanambong mao sila sa Talisay City Mayor Socrates Fernandez nga napiling konsehal ubos sa Alayon-Nacionalista Party ug bag-ong mga mayor nga sila si Jose Esgana sa Santa Fe sa One Cebu Party ug Zigfred Duterte sa Tabogon sa National Unity Party (NUP). Ang Alayon, NP ug NUP nagsuporta sa kandidatura ni Kong. Pablo John Garcia kinsa napilde ni Davide sa niaging eleksiyon.

Matud pa ni Davide nga wala siya nagdapit kang Fernandez apan siya nagtoo nga bout lang kining mopahalipay kaniya ug andam mosuporta sa iyang administrasyon.

 Si Fernandez nakig-ipon sa grupo nilang Johnny delos Reyes nga bag-ong napiling mayor sa dakbayan sa Talisay ug mga konsehales ubos sa LP.

Si Magpale nitug-an nga si Fernandez nagpasalamat sa iyang pasalig nga dili mahilabtan ang sinagop niining anak nga si Joavan kinsa anaa karon sa Cebu Provincial Detention and Rehabilitation Center.

Si Fernandez nipasabot nga humana ang eleksiyon ug ang mahinungdanon ang panaghiusa sa mga opisyal labi na nga iyang mga higala ang mga sakop sa LP sa ilang dakbayan. Nagtoo si Davide nga si Bogo City Mayor Celestino “Junie” Martinez ang nagdapit kang Duterte.

Gipadayag ni Davide ang kaandam sa pagdawat sa mga opisyal nga mosunod sa ilang direksiyon tumong sa pagkab-ot sa kausaban nga gitinguha sa Kapitolyo. Gisalikway ni Magpale ang pagtoo nga motapon na sa LP ang maong mga opisyal sanglit sayo pa kini nga himoon sa pagkakaron.

Daku ang pagtoo ni Magpale nga ang gihimo sa maong mga opisyal maoy tubag sa nahauna nilang tinguha nga maghiusa. (FREEMAN)