Pagpatay sa polis nakuhaan sa CCTV

CEBU, Philippines - Nakuhaan gyud og video footage sa Closed-Circuit Television camera ang pagkulata ug pagpatay sa polis nga si PO2 Gerlito Estremos niadtong Sabado sa kaadlawon diha sa dalan P. Del Rosario sa barangay Camagayan ning siyudad sa Sugbu.

Gibutyag ni Sr. Supt. Mariano Natuel Jr. director sa Cebu City Police Office nga aduna na sila’y hulagway sa duha ka lalaking responsabli sa kamatayon ni Estremos ug gihimo na ang manhunt operation batok kanila.

Sumala pa ni Natuel nga nakakuha na sila og kopya sa footage sa CCTV camera diin nakita kaayo ang  pagpatay ngadto sa biktima.

Padayag pa ni Natuel nga sa pagkakarun, ila na lang nga gipaabot ang approval sa lain pang establisemento nga mahatag kanila ang kopya sa footage sa ilang CCTV camera aron makatabang pa sa imbestigasyon.

Dako usab ang pagtuo ni Natu-el nga ang gigamit sa pagpusil patay kang Estremos mao lang ang iyang armas nga posibleng na-ilog gikan kaniya.

Sa laing bahin, nagpositibo usab sa gihimong paraffin test ang kanhi polis nga si PO3 Geoffrey Borinaga human kini maoy gitumbok nga responsabli sa pagpusil patay kang traffic enforcer Armando Daligdig niadtong Miyerkules sa         buntag.

Migawas usab nga nag-match ang slug nga nakuha gikan sa lawas ni Daligdig ug sa ballistic examination result sa armas nga nakuha gikan kang Borinaga nga nagpasabot nga ang maong armas maoy gigamit pagpatay sa maong traffic enforcer.  (BANAT NEWS)