Lider ug sakop sa fraternity sikop

CEBU, Philippines - Nagtingkagol sa karsel ang chapter president sa usa ka fraternity group uban sa iyang usa ka miyembro human kini maaktuhing mipahigayon og hazing sulod sa ilang  balay  sa may Tabucanal, Pardo.

Ang mga nasikop nailhan nga si Stephen Ocampo, 30, molupyo sa maong dapit ug giingong Chapter President sa Alpha Kappa Rho, ug ang miyembro niini nga si Romel Ybañez.

Sa pakighinabi sa Banat News ni SPO3 Joel Wenceslao, sa Pardo Police Station, gipadayag   niini nga aduna sila’y nadawat nga tawag gikan sa usa ka concerned citizen nga nagbutyag  bahin  sa tawong  nagsiyagit  sa kasakit.

Matud pa ni  SPO3 Wenceslao nga ang mitawag sa ilang buhatan mipadayag nga ila pang madunggan nga susama sa adunay nagbinunalay sa   sulod sa balay nga gipanag-iya diay ni Ocampo.

Diha-diha ang Alert team sa Pardo Police Station  daling mirespondi sa maong taho, ug  dihang ilang gisusi ang dapit mao gayuy nakita sa kapolisan nga nag-hazing ang grupo ni Ocampo.

Sa pakighinabi sa Banat News sa hepe sa kapolisan sa Pardo Police   nga si Sr. Insp. Jul Mohammad Jamiri mihulagway kini nga ang duha ka bag-ohay nang nagpamiyembro nga hapit  na  mahimong sakop sa Ahkro nabulit  ang  lawas  sa bun-og  ug  lagom,  nga  nalakip  na  ang  sampot   ug paa tungod kay  paddle  ang gigamit isip bunal.

Matud pa ni Jamiri nga karun pa sila nakamonitor sa gihimo sa maong grupo ug posibling magbalhin-balhin kini og lugar.

Apan iyang gipadayag nga mag-atubang gayud og kasong may labot  sa kalapasan  sa  Republic Act 8049 kon Anti-Hazing Law ang duha,  bisan pa  og  dili personal nga mopasaka og kaso ang duha ka biktima. (BANAT NEWS)