Mipatay ni Coniconde nadakpan

CEBU, Philippines - Nadakpan sa kapolisan ang dispatser nga nakadunggab patay sa kustomer sa Aljhon Karaoke bar sa barangay Guizo , dakbayan sa Mandaue sa hot pursuit operation nga ilang gipahigayon alas 2 sa hapon sa miaging adlaw.

Kini ang nasayran sa Banat News kang PO2 David Omambac sa kapolisan sa Presinto 1 sa Mandaue City Police Office (MCPO) sa follow up nga gihimo kagahapon.

Ang nadakpan mao si Henry Benavinte alyas Dondon, 32 , ulitawo nga lumad nga taga Manlunes, Dalaguete, Cebu ug  temporaryong nagpuyo sa sitio Basubas sa barangay Tipolo sa maong dakbayan.

Matud pa ni  PO2 David Omambac sa kapolisan sa Presinto 1 sa Mandaue City Police Office (MCPO) nga ang suspetsado ilang nadakpan sa gipuy-ang  balay sa kapuyo niining babaye sa sitio Basubas,  barangay Tipolo sa maong dakbayan.

Dugang pa niya nga ang maong dinakpan nga unang giila sa pipila ka mga saksi nga usa ka dispatser sa maong lugar nga nailhan lang sa angga nga Dondon nga giingong wala matino ang pinuy-anan.

Si PO2 Omambac miingon nga sa gitug-an kanila sa mga nakasaksi sa maong hitabo nga nag-inusara lang sa pagsulod sa maong karaoke bar ang biktima nga si Renato Coniconde nga lumad nga taga Capitol Site sa dakbayan sa Sugbo.

Samtang nag-inom ang biktima ug pipila ka botelya sa gi-order niining beer kalit lang nga misulod ang usa ka babaye nga giingong freelance nga Guest Relation Officer (G.R.O.) nga mao usab ang kapuyo sa nahisgotang suspetsado ug mitupad kini sa paglingkod sa lamesa nga gilingkoran sa biktima.

Ang  biktima nga nahingangha sa paglingkod sa maong babaye  daw milingolingo nga nagpasabot nga dili kini buot nga taparan nga maoy hinungdan sa pagsutoy og gawas sa maong babaye.

Dugang pa ni PO2 Omambac nga pipila ka gutlo sa paggawas sa maong babaye kalit lang usab nga misulod ang suspetsado sa nahisgotang karaoke bar ug gihansakan sa kutsilyo ang walang dughan sa biktima nga nakaingon sa hinanaling kamatayon niini.  (BANAT NEWS)