Kagawad nangulata’g babaye
CEBU, Philippines - Usa ka kagawad sa barangay Tanke, dakbayan sa Talisay, iyang anak ug bayaw, gipasanginlang nangulata og babaye didto sa ilang barangay hall niadtong Huwebes sa gabii.
Ang suspetsado mao si Kagawad Nelson Cabanes, 60 ,anak niining si JM “Boboy†Cabanes, 30, ug bayaw sa kagawad nga si Teresita Abay, 62.
Ang biktima mao si Nida Rimando, 60, taga sitio Galaxy, barangay Tanke.
Si Kapitan Perla Cabanes sa Tanke sa pakighinabi sa Banat News kagahapon mibutyag nga si Rimando mipasangil kang Cabanes nga mibahad nga ipapatay siya.
Matud ni Kapitan Perla nga si Cabanes maoy mipatawag kang Rimando sa barangay hall aron mahusay silang duha .
Kini tungod kay ang kagawad nabalaka nga maoy mapasanginlan kung adunay dautang mahitabo kang Rimando tungod sa nahisgutang tabi-tabi nga iyaha kuno kining ipapatay.
Ang schedule sa husay sa duha, mga alas 7:00 sa gabii niadtong Huwebes diin sa maong oras miabot si Rimando uban sa ginganlan og “Remy†nga giingong iyang testigos.
Si Cabanes giingong misulti kang Rimando nga dili una pasudlon si Remy tungod kay sila unang duha ang mag-istorya.
Matud ni Kapitan Perla nga miinsister si Rimando nga pasudlon gyud ang iyang testigos hinungdan nga miulbo ang tensiyon.
Apan matud ni Kapitan Perla nagbinabaay na ang isig ka habig hinungdan nga iya kining gibadlong apan wala kini mamati ug giuwang na kini sa mga tanod ug ilang mga paryente.
Gihimakak ni Kapitan Perla nga gitabangan og kulata si Rimando nila ni Cabanes ug sa anak ug sa bayaw niini sulod sa barangay hall.
Matud niya nga walay nahitabong pagpangulata niadtong higayona ug gani walay makitang bun-og sa lawas ni Rimando.
Si JM ug Teresita giingong igo lang usab kining mitabang og uwang kang Cabanes ug Rimando dihang nagkalalis na kini ug gani si Teresita nakaangkon kini og samad sa ngabil apan wala matumbok kung kinsay nakasamad kaniya.
Kagahapon ang Banat News mitawag sa balay ni Cabanes aron makuhaan kini sa iyang habig apan giingong milakaw kini ug wala usab kini sa barangay hall
Si Rimando sa iyang bahin, giingong mibahad kining mopasaka og kaso ngadto sa Ombudsman batok kang Cabanes.
Ang Banat News mitawag usab kini sa telepono sa panimalay ni Rimando aron makuhaan usab kini og dugang pamahayag.
Ang nakatubag sa tawag niini mao si Raquel Base, 50 kinsa nagpailang ig-agaw ni Rimando.
Matud ni Base nga adunay gilakaw ang iyang ig-agaw ug nagkanayon kini nga sa nahitabong engkwentro diha sa barangay hall napiang ang tuong bukton sa iyang ig-agaw ug nakaangkon kini og mga bun-og sa nawong ug lawas. Gibutyag ni Base nga gihuwat na lang sa iyang ig-agaw ang medical certificate ug nagplano kining moduso og reklamo ngadto sa Ombudsman batok kang Cabanes. (BANAT NEWS)
- Latest
