Kapin sa 20 ka pakiteng shabu sikop

CEBU, Philippines - Mokapin sa 20 ka lain- laing gidak-on sa pakite sa gidiling drugas nga gituohang shabu ang nasakmit sa kapolisan   sa  ronda  nga ilang  gilusad didto  sa pinuy-anan sa gitumbok nga drug pusher  kinsa  nasakmitan pa og linibo ka pesos nga halin didto sa barangay Dayhagon sa lungsod sa Medillen niadtong Biyernes sa alas 3:45 sa hapon.

Hinuon adunay duha ka mga manuyopay ang nakaeskapo sa maong pagpangronda tungod kay mga armado kini ug nisukol pa ug namusil sa mga polis dihang nadiskobrehan ang ilang pagpanuyop.

Apan ang ilang mga kaubanan nga manuyopay nasikop sa mga polis nga mao sila si Gersen Daitol, 35, ulitawo ug taga barangay Taytayan siyudad sa Bogo, Michael Ico Batayola,33 , minyo, mananagat ug taga Kawayan, Masbate, Ernesto Banate,32 , taga Suba siyudad sa Danao nga usa ka electrician ug ang assistant  electrician nga si Efren Damecog, 50, minyo ug nasikop usab ang gitumbok nga pusher nga si Louwell Dinaymay, 36, minyo ug nagpuyo sa maong lugar. Samtang wala makuha ang ngalan sa lain pang duha ka manuyopay nga naka- eskapo tungod kay misukol kini ug namusil sa mga polis nga pulos armado ug wala matino nga kalibre sa armas.

Samtang ang mga butang nga nakuha sa maong pagpangronda naglakip sa  17 ka pakite nga gituohang  adunay sulod nga shabu, laing 1 ka medium size, ingon man 7 ka pakite nga ginamit na nga aduna gihapoy sulod nga gituohang shabu.

Ang ubang mga nasakmit nga butang mao ang  drug paraphernalias sama sa ruled tin foil, gunting, lighter ug cellphone, ingon man P10 mil  nga gituohang halin sa maong gidiling drugas.

Matud ni SPO3 Rolland Reyes sa Medillen Police Station dihang nahinabi sa Banat News,  nga ang kapolisan nga gipangulohan sa hepe nga si C/Insp. Fructoso Lim daling milusad og pagpangronda human nakadawat og impormasyon sa grupo sa mga lalaki nga nanuyop sa pinuy-anan sa gidudahang drug pusher nga nahimutang sa luyong bahin sa eskwelahan sa maong lugar.  (BANAT NEWS)