Sayaw sa CPDRC kuhaa’g video ni Tayag
CEBU, Philippines - Ania sa Sugbo karong hapon ang usa ka taas nga opisyal sa Department of Health aron mokuha og video sa sayaw sa mga piniriso sa Cebu Provincial Detention and Rehabilitation Center (CPDRC) nga gamiton sa kampanya batok sa dengue.
Si DOH Assistant Secretary Dr. Eric Tayag ang gikatakda nga mosayaw kauban sa mga piniriso sa CPDRC karong hapon.
Niadto pang niaging buwan si Tayag nga nilusad sa kampanya batok sa dengue sa pipila ka bahin sa Luzon ug ang pagbatasan sa pagpanglimpyo matag alas 4 sa hapon pinaagi sa pagsayaw sa Oppa Gangnam Style.
Gipresentar usab ni Tayag ang DOH “Aedes†mascot ug ang “Stop, Look, Listen†nga orasan nga nagpakita sa alas 4 nga oras sa pagpanglimpyo.
Dili hinoon makakuyog ang kasamtangang gobernador nga si Agnes Magpale kang Tayag gumikan sa iyang tambongan nga kalihukan sa lungsod sa Borbon.
Apan giklaro ni Magpale nga nag-una na ang Sugbo sa kampanya batok sa dengue pinaagi sa grupo ni Dr. Wayben Briones sa Cebu Medical Society ug sa Rotary Club of Cebu-Metro.
“Pero kita dinhi sa Cebu , we are even going beyond that through the effort of Dr. Wayben Briones,†matud pang Magpale.
Sa niaging tuig, gilusad sa Rotarians ug mga barangay health workers ang kampanya batok sa dengue sa 20 ka barangay sa dakbayan sa Sugbo nga giilang dunay daghang kaso sa dengue.
Ang grupo namutang og usa ka matang sa kemikal nga mopatay sa itlog sa lamok apan luwas sa mga tawo.
Si Briones nipresentar niini kang Magpale apan gumikan sa tulo na lang ka semana nga nahabilin sa iyang termino, gihangyo sa kasamtangang gobernador nga huwaton na lang nga molingkod ang bag-ong gobernador sunod buwan.
Ang hangyo ni Briones mao ang paggamit sa mga BHWs sa pagtabang sa pagpang apod-apod sa mga kemikals ngadto sa katawhan. (Gregg M. Rubio/WC) (BANAT NEWS)
- Latest
