100 ka mga kawani sa city hall manglimpyo

CEBU, Philippines - Mokabat sa 100 kapin ka mga empleyado sa Mandaue city hall ang mosalmot sa pagpanglimpyo sa merkado publiko sa dakbayan karong adlawa. Si Mosulini Suliva, piyado  sa mayor  sa merkado, nagkanayon nga sagad sa mga mamaligyaay  sa merkado wa nagpakabana sa pagpanglimpyo hinungdan nga siya nangayo og panabang  sa tanang mga empleyado sa city  hall. Siya nanghinaut nga pinaagi sa ipahigayong clean-up operation sa merkado karong adlawa ,makadasig usab kini sa mga manindahay  sa merkado nga kanunay nang manglimpyo sa ilang tag-sa tagsa ka palibot.

Gisuwatan ang tulo ka vendors association sa pagsalmot sa pagpanglimpyo,  sumala ni  Suliva.

Si Suliva  usab nagkanayon nga aduna pay laing batch sa mga empleyado sa city hall ang mopahigayon og linaing pagpanglimpyo sa merkado apan wa masuta kun kanus-a ipahigayon.

Nasayran nga karong tuiga, 60 ka mga citation tickets ang naisyu ngadto sa mga mamaligyaay nga nagpataka lang og labay sa ilang mga basura ug kini naglakip  sa mga lalaking mamaligyaay nga mangihi   sa  bongbong  lang  sa  merkado. Ang pagpanglimpyo sugdan  karong alas 10:00 sa buntag sanglit gamay pa ang mga mamalitay   sa maong oras.

Si Suliva   midugang  nga siya nadismaya nga bisan kun aduna nay mga paskin nga nagdili sa pagpataka og labay   og  sagbot  apan wala  kini  tagda  sa  mga  vendor  .       Gani  sa  wet section , ang ubang manindahay ang nagpataka lang og labay sa mga dubok ug wa mahalin nga mga isda   ngadto  sa  drainage sa merkado. Ang merkado  adunay  20 ka mga market guard nga nagtrabaho sud sa tulo ka shifting ug duha o tulo lamang kanila ang gitahasan sa pag- monitor sa mga nagpataka og labay sa ilang mga basura. (Flor Z. Perolina/WC) (BANAT NEWS)