P12 milyones wala makuwentada ni Rama
CEBU, Philippines - Si Mayor Michael Rama ug tulo niya ka “close aides†wala pa makahatag og kompleto nga kwentada kun giunsa nila paggasto ang kapin sa P12 milyones nga gitugyan kanila aron gamiton sa mga proyekto sa dakbayan sa Sugbo.
Basi sa rekord sa Cebu City Accounting department ang mayor nahatagan og cash advance nga P557,150 kaniadtong Mayo 31, ug sa pagka Disyembre 26, sa miaging tuig ug wala pa makahatag og kwentada hangtud karon.
Sigun sa kasayuran nga kining kwarta nga nalista kang Rama gigamit kini sa mga opisyal sa Local Disaster Risk-Reduction Management Council pag-adto sa mga dapit sa ubang bahin sa nasud nga naigo sa grabeng katalagman.
Ang tulo ka close aides sa mayor nga sigun sa rekords sa Accounting department wala pa usab makahatag og kwentada mao sila si Carlos “Charlie†Reyes, Henry Tomalabcad ug si Philipp Zafra.
Si Zafra nga maoy Chief of Staff sa Office of the Mayor nahatagan og P4,500,000 kaniadto pa’ng Disyembre 22, 2011 samtang si Tomalabcad nahatagan usab og duha ka milyon ka pesos kaniadtong Hulyo 13, 2011 ug Septiyembre 7, 2012. Matud ni Zafra nga sila si Tomalabcad nakasumiter na og kwentada kun giunsa nila pagamit ang kwarta nga gihatag kanila apan sanglit gikan man kini sa Intellligence Fund, didto nila gisumiter sa Commission on Audit-Manila.
Si City Accountant Diwa Cuevas miingon nga bisan og nakasumiter na sila si Zafra ug Tomalabcad sa ilang kwentada apan dili nila matangtang sa listahan hangtud nga ang COA-Manila mopadala kanila og pahibalo nga kompleto ang dukomento.
Apan sa tulo ka opisyal ni Rama, si Reyes maoy wala pa gayud makatiwas paghatag og kwentada sa iyang nadawat nga P4.5 milyones kay basi sa rekord aduna pa siya’y P3,993,200 nga obligasyon ug gani wala na siya hatagi sa iyang sweldo gikan kaniadtong Enero.
Si Reyes mitug-an nga ang iyang nadawat nga cash advances gigamit sa sports program sa dakbayan diha sa kabarangayan diin ang City Hall maoy mohatag og premyo sa mga liga sa basketball. ( Rene U. Borromeo/WC) (BANAT NEWS)
- Latest
