Nag-inusarang nag-inom gipatay

CEBU, Philippines - Patay ang usa ka trabahante sa Mactan Export Processing Zone (MEPZ) sa dakbayan sa Lapulapu human  kini lubaa  sulod  sa  videokehan sa barangay Guizo, dakbayan sa Mandaue,    sa miaging kaadlawon.

Si PO2 Modesto Lutchavez sa kapolisan sa Presinto 1 sa Mandaue City Police Office (MCPO) miila sa biktima nga mao si  Renato Coniconde, 45 , minyo nga nagpuyo sa Capitol Site sa dakbayan sa Sugbo.

Giila lamang sa ngalan nga Dondon Villavente   nga usa ka dispatcher sa Mandaue  ug walay permamenteng pinuy-anan sa dakbayan sanglit adunay nag-ingon nga   siya  taga barangay   Tipolo, taga barangay Labogon, taga barangay Tabok ug  adunay nag-ingon nga taga barangay Talamban sa dakbayan sa Sugbo.

Dugang pa ni PO2 Lutchavez nga nag-inusara nga misulod ang biktima sa Aljun Karaoke bar sa barangay Guizo sa maong dakbayan ug milingkod kini og lamesa ug nag-order og pipila ka botelya sa beer.

Sa pagyarok sa biktima sa usa ka botelyang beer,  misulod    usab  ang freelancer nga babayeng mubo  og lupad nga mapahiyomon usab nga mitupad   kaniya sa paglingkod.

Ang biktima nga gustong mag-inusara lamang sa gilingkorang lamesa mibalibad sa maong babaye  nga dili makig-table kay ang budget nga iyang gidala igo lamang kaniya.

Gumikan sa pagbalibad sa biktima sa maong babaye  nagdali kini sa pagbarog ug  paspas kining milakaw paingon sa gawas apan pipila ka gutlo ang nakalabay  misulod  usab ang suspetsado nga nagdala og kutsilyo ug gidunggab ang biktikma  sa makadaghang higayon nga nakaingon sa hinanali niining kamatayon.

Human sa pagdunggab nagdali usab sa paggawas ang maong suspetsado ug misibat kini pahilayo pinaagi sa pagpaingon sa  wala  mahibaw-ing lugar nga niini gitagoan sa maong dakbayan. (/WC) (BANAT NEWS)