Tunga sa milyon nabawi gikan sa mga katabang
CEBU, Philippines - Nagtingkagol sa karsel ang usa ka inahan nga katabang ug laing menor de edad nga kaubang katabang human pasanginling mikawat sa kapin One-Million Yen sulod sa lawak sa iyang amo diha sa Winland Tower pasado alas-7 sa miaging gabii.
Ang nasikop mao si Carmelita Flores, 54, uban sa laing katabang niini nga 17-anyos.
Matud pa ni Flores nga siya maoy gitahasan aron mobantay sa anak sa magtiayong Katsuhiko Shigeuchi ug Jane hinungdan nga makasulod gawas siya sa lawak sa magtiayon.
Giangkon niyang natintal siya sa pagkakita sa binandol nga kwarta sa Hapon ug mikuha siya og 130 ka buok nga kwarta apan nasakpan siya sa 17-anyos nga kauban. Inay mopatuo sa badlong sa batan-on iyaha lang kini gipahilom kay hatagan na lang niya kini.
Ang menor de edad nga kaubang katabang ni Flores nakadawat og 27 ka yen money nga tag 10 mil Yen samtang si Flores giingong midala sa 103 ka tag 10mil Yen nga mokabat karon og kapin P500 mil sa kwartang Pilipinhon.
Apan wala sila magtuong makamatikod ang magtiayon kinsa mipadakop kanila. Unang nabisto mao ang batan-on tungod kay nabawi gikan sa iyang butang ang 27 ka buok nga Yen.
Si Flores didto na madakpi sa ilang balay ug nabawi gikan kaniya ang 103 ka yen money nga wala pa niya mahilabti.
“Tungod lagi sa dakong kalisod unya aron sad makatiwas akong anak sa college ug high school, ako ra man gud nagpaeskwela sa akong mga anak kay akong bana wala may trabaho,†padayag pa ni Flores kinsa miangkong grabe ang kakulba niya maong wala gyud niya kini gastoha dayon. (/EIM) (BANAT NEWS)
- Latest
