CH modangop sa DENR bahin sa lote palibot sa Compania Maritima

CEBU, Philippines - Gusto masayran sa mga opisyal sa dakbayan sa Sugbo gikan sa Department of Environment and Natural Resources (DENR) kun kinsa gyud ang tag-iya sa yuta nga giangkon sa Cebu Port Authority (CPA) nga anaa mahimutang palibot sa karaang Compania Maritima.

Ang Planning and Development Office nga maoy mohimo sa maong gimbuhaton didto sa DENR kay daghan ang nagtoo nga dili tinuod ang pangangkon sa CPA nga sila ang tag-iya sa luna.

Nakabantay ang mga sakop sa Coastline Management Board nga ang luna nga giangkon sa CPA nahimo dihang gi-reclaim sa Department of Public Works and Highways (DPWH) ang kaniadto dagat nga dunggoanan sa mga barko sa George & Peter Lines.  

Ang pag-reclaim sa maong bahin sa dagat gihimo tungod sa pagbuhat og rampa ug tunnel nga magdugtong sa South Coastal Road lahos na sa President Osmeña Boulevard nga kanhi McArthur Boulevard.  

Ang mga opisyal sa CPA nangangkon nga ang maong luna gitugyan na kanila sa DPWH apan mga opisyal sa City Hall miingon nga human ma-reclaim ang maong dagat kaniadto dili ang DPWH maoy tag-iya kun dili ang DENR. (BANAT NEWS)