Computerized issuance sa police clearance gitun-an sa CH

CEBU, Philippines - Nagsugod na ang kadagkoan sa Cebu City Hall sa pag-asikaso nga ma-computerize na ang pag-isyu sa police clearance diha sa Cebu City Police Office aron dili na masakripisyo ang molukat sa maong dukomento.

Ang mga sakop sa Police Coordinating and Advisory Council (PCAC) nga gipangulohan ni Engr. Eugene Elizalde mituki niining maong isyu atul sa ilang tigum kagahapong adlawa.

Usa ka kompaniya nga atua magbasi sa kaulohan mipadangat na og sugyot nga sila maoy moserbisyo pinaagi sa pagbutang og kahimanan, nagpasabot nga walay gasto sa dakbayan sa Sugbo apan mopatong lang sila og “service fee.”

Si City Treasurer Emma Villarete mipasabot nga bisan og mosaka og gamay ang kantidad nga mabayran sa molukat og police clearance apan mas arang-arang gihapon kini kun itandi sa magpaabot sila’g duha ka adlaw aron makuha ang ilang dokumento.

Matud ni Villarete nga kun ma-computerize na ang pag-isyu og police clearance dali na lang kaayo mahatag ang dukomento ug wala na’y hasol nga magpakuha pag hulagway kay ang sistema anha ra sila kuhai og photograph sa police station. Si Villarete miingon nga ang sistema susama sa gihimo sa National Bureau of Investigation (NBI) nga paspas ang paghatag nila og clearance sa mga nanginahanglan.

Matag adlaw adunay gibana-bana nga 200 ka tawo nga molukat og police clearance sa Cebu City Police Office kay ang CCPO mokolekta man og P360,000 ang buwan kun tag P18,000 ang adlaw gikan sa Lunes hangtud Biyernes. Ang bayad sa police clearance tag P45 sa ordinary clearance ug tag P125 sa clearance niadtong gusto nga moadto sa laing nasud. (BANAT NEWS)