Bag gilaslasan P16 mil nawagtang

CEBU, Philippines - Nahanaw ang mahalon nga cell phone ug salapi sa usa ka babaye nga nag-ampo sa sulod sa simbahan sa Saint Joseph Parish Church sa barangay Centro, dakbayan sa Mandaue human laslasi  ang shoulder bag niini   sa miaging  gabii. Si PO1 Alfie Sobuero sa kapolisan sa Presinto 1 miila sa biktima   nga  si Ellen Mae Sanoria, 39, dalaga nga taga barangay Cabancalan sa maong dakbayan.

 Matud pa ni PO1 Sobuero nga segun  sa gitug-an  sa biktima   nga misulod kini sa maong simbahan alas 8:00 pasado ang takna sa miaging gabii ug gipahimutang ang iyang shoulder bag sa kilid nga bahin sa iyang gilingkoran.

Dugang pa sa biktima nga gikatupad usab niini ang wala hiilhing lalaki nga seryoso usab nga nagluhod ug nagpiyong-piyong pa sa mata nga mohangad ug moduko samtang nag-ampo.

Gitug-an sa biktima nga sa paglabay sa pipila ka gutlo  mibarog ang wala hiilhing lalaki ug nagdali sa paggawas sa simbahan, dayon  iyang gipunit   ang  iyang  bag.

Si PO1 Sobuero miingon nga nahingangha na lamang ang biktima sa pag-alsa sa iyang shoulder bag kay natagak man ang sulod niini ug sa iyang pagsusi gilaslasan   diay,  busa  nabuslot.

Gitug-an sa biktima nga nahanaw ang iyang cell phone  nga nagkantidad og P16,000, pitaka  nga wala na matino ang kantidad nga gituohan niini nga gisakiyo sa kawatan nga nagpatuo lamang nga misimba usab ug nag-ampo. (BANAT NEWS)