Sagpa sa polis ang pagtulis sa Palawan pawnshop

CEBU, Philippines - Dakong sagpa  sa kapolisan ang  pagtulis sa Palawan Express Padala (PEP) kay wala dayun hiabti  niini ang kawatan niadtong Martes sa buntag.

Kini maoy gibuhiang pamahayag sa hepe sa kapolisan sa dakbayan sa  Sugbo  nga   si Sr. Supt Mariano Natuel Jr. .

Samtang  sa laing  bahin   ingon  og gibasol niya ang maong establisemento tungod kay wala kini seguridad nga tarong.

"Tinuod na it’s a slap on the face of the police station but as you can see sa pagkakaron no tinuod na siya nga daring na kaayo ang mga robbers kay wa nay gipili." Dugang pa ni Natuel nga makahatag sila og pasidaan sa mga establisemento nga adunay  umaabot nga mga dautang elementong moigo sa dakbayan.

Apan gipadayag usab niini nga dali silang makarespondi sa maong panghitabo kun mareport kini dayun apan ang nahitabo niadtong Martes sa buntag ,hilom  kaayo ang nahitabong tulis.

Gani, bisan ang tapad nga establisemento niadtong tungora wala makabantay o makahibalo nga aduna diay tulis nga nahitabo  sa PEP. Gipasabot ni Natuel nga ang kapolisan dali ra kaayong maka-alarma kun ugaling ila kini nga masayran diha-diha dayon.

Kini tungod  kay mas labing maayo   nga magdoble ang siguridad kaysa magkulang kini nga mahisama na hinoon sa nahitabo niadtong Martes sa buntag.

Gipadayag usab ni Natuel nga ang tanan dili na  angay  pang magkompyansa tungod kay bisan  duol na kaayo ang establisemento sa buhatan sa kapolisan wala gihapon kini kukahadlok nga manulis.

Kahinumdoman nga niadtong Martes sa buntag dihang nag-abli sa roll-up door ang usa sa  mga trabahanti sa maong tindahan, giingong kalit lang kini nga gitaparan sa tulisan ug mideklarar   nga tulis,  dayon   misulod sa maong buhatan ug gikuha ang P150 mil  ug kabtangan sa trabahante. (BANAT NEWS)