Kamatayon ni Banosong may 2 ka saksi

CEBU, Philippines - Aduna nay duha ka saksi nga gihuptan ang kapolisan karon subay sa pagpusil patay   ni  konsehal Joaquin Banosong  sa lungsod  sa Argao  niadtong Lunes sa hapon. Ang hepe sa kapolisan sa lalawigan sa Sugbo Sr. Supt. Patrocinio Comendador mipadayag nga  ang  maong  mga  saksi  maoy  makatumbok kun si kinsa ang  mipatay kang Banosong.

Matud pa ni Comendador nga tanang anggulo maoy ilang gisubay karon apan aduna sila’y mas gitutokan pang  anggulo  nga  susama sa posibling panagbangi tali sa mamumuno ug sa biktima.

Mahimo  usab  nga   posibling adunay nasuko sa biktima kalabot sa negosyo niini, dugang  ni  Comendador.

Si  Comendador  miingon  nga  karong adlawa aduna silay ipahigayong case conference   aron ilang masuta kun unsa na ang kalamboan sa gihimong imbestigasyon.

Samtang gipadayag usab ni Comendador nga dako siyang uyon sa gitanyag  ni Mayor Edsel Galeos   sa Argao  nga  P50 mil  ang kantidad sa pahalipay sa tawo nga makatumbok   hangtud  nga  masikop   ang  responsabli   nga nagpatay sa konsehal.

Giingong ang tanang kadagkuan sa lungsod nagtampo-tampo aron lang  ikahatag ang maong kantidad ngadto sa  hingtungdang  saksi. Kahinumdoman nga niadtong Lunes sa hapon, pasado alas 5:00  sa hapon, giulo pagpusil si Banosong human kini mamalit og isda sulod sa merkado.

Kadaghanan sa Argawanon hilabihang  katingala ug nakurat sa pagpamusil tungod kay ang konsehal wala may gidungog nga kontra. (BANAT NEWS)