TV crew gihasi sa langyaw

CEBU, Philippines - Reporter ug crew  sa telebisyon ang nagpa-blotter human sila giingong gi-harass sa usa sa upat ka mga Papua New Guinean National nga gialarma tungod sa pagpanghagis niini sulod sa usa ka bar sa may Mango Avenue kagahapon  sa hapon.

Ang crew sa TV5-Cebu nga gilangkuban nila  ni  Jinky Bargio ang reporter, cameraman Noel Sanico ug News Assistant nga si Ferdinand Dugay, daling miadto sa usa ka bar sa maong dapit aron unta coveran ang gi-alarma sa kapolisan nga upat ka langyaw’ng nanghagis.

Apan imbis nga mag-cover sila niini, sila na man hinuon ang gisita ug gikontra sa upat ka mga langyaw nga sila  si  Nelson Charles, Lloyd Simago, Humphrey Madi ug Russel Maikan nga giingong   taga Papua New Guinea. 

Giingong tungod sa kasuko sa usa sa mga langyaw gipakitaan pa sila og ‘dirty finger’ niini. Ug  wala usab kini makontento giingong gihilabtan usab niini ang camera sa cameraman nga nagkuha og video footage.

 Tungod sa nahitabo  mitumaw ang tension ug tinubagay tali sa reporter ug sa langyaw.  Ang upat ka hubog nga langyaw dali usab nga gisikop sa kapolisan tungod  kay  namuak   og mga botelya sulod sa usa ka bar.

Gani, ang mga taxi nga miagi sa ilang tungod  giingong  buk-an  og  botelya nga maoy nakaaghat sa concerned citizen  sa pagtawag  og  polis.

Ang saksi nga si Jimmy Ruiz, nakakompirmar usab sa nadawat nga taho sa kapolisan kini human niya  makita   ang gihimo sa upat.

"Mismo ang taxi nga may pasahero ilang ablihan nya nay taxi nga ilang gibunalan og beer, ang mga babaye mismo nanagan kay nahadlok man nila." Matud pa sa reporter sa telebisyon nga si Bargio nga iya gayud nga ipapriso ang upat tungod sa ka-hambogero niini ug tungod usab sa gibuhat niini sa uban.

Human sa maong  hitabo, daling nagpa-blotter ang TV5 Crew sa Police  Station 2 samtang ang upat ka langyaw gipaubos sa liquor test ug giingong  positibo usab kini.

Dihang naabot sa Police Station 2, padayon gihapon ang pagbinastos sa upat ka langyaw uban  ang ‘dirty finger’   niini  samtang nagdumili  sila sa pagtubag sa mga pangutana. (BANAT NEWS)