Drunk driving law sobra ra kaayo— Mayor Rama

CEBU, Philippines - Gisaway ni Mayor Michael Rama ang bag-ong balaud nga mosilot sa mga drayber nga masakpang magmaneho og sakyanan nga ubos sa gahom sa mga ilimnong makahubog tungod sa kadako sa kantidad sa multa niini.

Matud ni Mayor Rama nga dili siya moawhag sa kapolisan ug ubang tigpatuman sa balaud nga ipatuman ang Republic Act 10586 dinhi sa dakbayan kay wala siya makagusto niining balaura.

Nasabtan ni Rama nga maayo ang tumong sa balaud nga aron dili gyud moinom og ilimnong makahubog ang mga drayber nga magmaneho og sakyanan apan ang iyang gireklamohan mao ang gidak-on sa multa.

Ang multa mao nga kadtong  nagmaneho nga masakpang nakainom og lapas sa Blood Alcohol Content (BAC) silotan og P20,000 ngadto sa P80,000 apan kun makabangga ug makaangol kini og mga tawo ang multa moabut na og P200,000.

Kun ang aksidente nga mamugna sa hubog nga drayber mosangpot og pagkakalas sa kinabuhi, ang multa patas-an gikan sa P200,000 ngadto na sa tunga sa milyon ka pesos.

Ang bag-ong balaud gipirmahan na ni Presidente Benigno Aquino dili pa lang dugay.

“Ah, binuang na. Balaud na nga buang. Dapat ila na nga gitan-aw kay basin og gidali-dali na og approve. You don’t make laws abided by because of exorbitant penalty. You make laws being observe and complete and complied with because there is respect, instead of fear kay kun gani og dili pa maka-afford ang madakpan kadaghang mangapriso,” matud ni Rama.

Matud ni Rama nga ang balaud kinahanglang makiangayon ug dili kay sobra kaayo ang silot.

Usa ka drayber og habal-habal nga si Rommel Liquin miingon “Grabeha ana nga balaud uy, kun madakpan ta mabaligya na lang ang atong motor sa kadako sa multa.”

Ang bag-ong balaud nga bisan sa unang higayon nga madakpan ang drayber nga hubog ang ilang lisensya sakmiton ug irebokar ug dili na hatagan og higayon nga maisyuhan og bag-ong lisensya.

“Kun dagku kaayo’g multa dili na mao. Ang pinaka-importante nga kun mo-address man gani ta’g problema it has to jibe with the economic condition,” matud ni Rama.

Kun ang sakyanan makit-an nga mag-ekis-ikis pagdagan og sobra ra kaayo kapaspas ang dagan ingon man mokalit lang paghunong timailhan na kini nga ang drayber hubog ug angayan na kuhaan og liquor test.

Pananglit ang drayber dili mouyon nga kuhaan og testing sakmiton ang iyang lisensya ug irekomendar nga rebokahon.

Matud ni Arnel Tancinco nga maoy assistant regional director sa Land Transportation Office (LTO) nga mapugos sila pagpatuman sa balaud.

Apan si LTO-7 director Raul Aguilos miingon nga maghuwat pa sila sa Implementing Rules and Regulations. (BANAT NEWS)