Babayeng mipunit sa gamay’ng bag nakita sa camera

CEBU, Philippines - Nasakiyo  sa  wala  hiilhing  babaye  ang  P3 mil  cash  ug  mga  personal  nga  butang  sulod  sa usa ka gamay  nga  bag (pouch)  nga  gipunit  niini  sulod  sa usa ka  tindahan  sa dalan  Colon,  syudad  sa Sugbo  kagahapon  sa buntag.

Si  Henry Dumon, 45, minyo, ug  messenger  sa Global Dimension,  nga  taga  dalan  Urgello,  ning  dakbayan  sa Sugbo, misumbong  sa Banat News  nga didto  siya sa  sulod  sa 7/11  nga tindahan  sa eskina  Colon ug Pelaez  uban  sa iyang  asawa  dihang  wala  niya  hisayri  nga  natagak  sa sawog  sa tindahan  ang  iyang  bag.

Ang maong  bag  may sulod  nga P3 mil cash  ug  mga  mahinungdanong  papeles  ug  mga  identification  card.

Tungod kay  nasuta  niya  nga  diha  ra  sa sulod  sa maong tindahan  mawagtang  ang  iyang  bag,  iya  kining  gisumbong  sa  tagdumala  sa maong  tindahan.

Dihang  gihiling  ang closed circuit television (CCTV) camera sa  tindahan  nakita ang  usa  ka babaye  nga  mipunit  sa maong  bag. Sa  CCTV  camera  klaro  kaayo  ang  dagway  sa babaye  apan  wala  lang  makaila  ang  biktima  niini.

Matud  pa  ni  Dumon  nga  iya  na  nga  napakita  ang  video  nga kinopya  gikan sa CCTV  camera  sa 7/11  ngadto sa kapolisan  ug  sa  mga  estasyonan  sa radio  ug  television.

Sa  pagtuo  niya  nga  ang  Banat  News  usa  sa makatabang  nga  mahiuli  sa maong babaye  ang  iyang  bag  ug  ang  salapi  nga  sulod  niini  uban sa  mga  ID,  iya  kining  gisumbong  dinhi  sa maong  pamantalaan. (BANAT NEWS)