Konsehal nga mangasaba angay biyaan — Rama

CEBU, Philippines - Giawhag ni Mayor Michael Rama ang duha ka opisyal sa Local Disaster Risk Reduction Management Council (LDRRMC) nga biyaan ang mga konsehal kun kini mangasaba atol nga sila ipatawag sa executive session ugma.

Matud sa mayor nga sila si Cathy Yso ug Alvin Santillana, hepe ug operations officer sa LDRRMC, makahimo pagtambong sa sesyon ug manubag sa pangutana sa mga konsehal kabahin sa mga proyekto nga buot ipatuman sa ilang opisina karong tuiga.

Si Rama miingon nga kun mangasaba gani ang mga konsehal sa iyang mga department ug division head dili sila angayang atubangon ug giawhag sila si Yso ug Santillana nga biyaan  ang  sesyon. 

Usa sa proyekto nga buot ipatuman sa LDRRMC mao ang pagpalit og usa ka “walking excavator” nga kantidad og P20 milyones aron gamiton sa paglimpyo ug pagpalawom sa kasapaan dinhi sa dakbayan.

Ang maong ekipo susama ra sa payloader apan kun tan-awon mura’g kaka tungod kay aduna kini mga tiil nga makahimo sa paglihok nga mura’g maglakaw.

Ang Bids and Awards Committee (BAC) mirekomendar nga si Mayor Rama hatagan og katungod sa konseho nga makabukas og Letter of Credit sa Land Bank of the Philippines aron pagpalit sa walking excavator. Kun ang dakbayan maoy mobayad pinaagi sa Letter of Credits unya ulian ra sa supplier, mahimong makabarato ang City Hall kay ang supplier dili na man mopabayad sa importation taxes. (BANAT NEWS)