2-anyos naagtang sa kalibre 45 patay

CEBU, Philippines - Patay ang usa ka 2- anyos nga batang lalaki human maigo sa agtang sa usa ka saag nga bala dihang maoy naigo sa pagpamusil ngadto sa usa ka gipasanginlang kawatan og manok sa iyang silingan diha sa barangay Garing sa lungsod sa Carmen sa alas 9:30 sa milabay’ng Domingo.

Ang biktima nga patay nang naabot sa tambalanan mao si Tevence June Salabao, nagpuyo sa maong lugar samtang ang suspek mao ang iyang silingan nga si Pedro Durano, 32.

Matud pa gipusil unta ni Durano ang gipasanginlan niining notadong kawatan og manok sa ilang lugar nga si Jemar Sabellano apan ang bata na hinuon maoy naigo. Sumala pa ni SPO2 Danilo Laurente sa Carmen Police dihang nahinabi sa Banat News ang suspek nakamatikod ni Sabellano nga mosuway na pud unta pagpangawat sa iyang mga manok igtatari. Tungod kay daghan namang manok hiniktan sa suspek nga nangawala nadako ang kalagot niini kang Sabellano maong mikuha siya sa iyang armas nga kalibre .45 ug gigukod kini.

Dihang iyang gipusil ang bata na hinuon maoy naigo. Nagduwa niadtong tungora sa gawas sa balay ang biktima. Ang suspek daling miikyas apan kagahapon sa buntag mitahan kini sa kapolisan. Giingong nakonsensiya ang suspetsado sa nahitabo sa bata ug tungod sa kalibog miikyas siya niadtong higayuna.  (BANAT NEWS)