Polis mibutang og 49 ka police assistance center

CEBU, Philippines - Gipahiluna sa Mandaue City Police Office (MCPO)  ang  mga Police  Assistance   Center (PAC) sa 49 ka mga tulunghaang publiko sa kabarangayan sa maong dakbayan   kagahapon  sa pag-abli  sa klase.

Si Senior Superintendent Petronilli Baldebrin, director sa kapolisan sa maong dakbayan  mihimo  niini tungod sa dako niining tinguha nga mapatuman ang kahapsay ug kalinaw sa matag  publikong tulunghaan sa kabarangayan.

Ang PAC  gibutang  aron  kadangpan sa  mga  ginikanan  ug  kabataang  nagtungha nga  makasugat og  suliran.

Matud pa ni Baldebrin nga iyang gidasig ang kabataan nga mabiktima sa pagbugal-bugal  sa kauban nilang tinun-an nga mosangko na hinuon sa kaguliyang.

Si Baldebrin miingon nga kun makasinati   sa maong suliran ang mga tinun-an  kinahanglang  ipadangat  nila  kini  ngadto  sa   mga polis sa PAC nga gipahimutang sa atbang sa mga tulunghaan.

Dugang pa niya nga dili hinuon hingpit nga makasulbad ang mga polis sa maong kakulian sa mga tinun-an sanglit ang bugtong nilang mahimo mao man ang pag-indosar  ngadto sa ilang administrador sa ilang tulunghaan.

Sa nasayran nga gipalig-on usab ang seguridad sa mga department store, mall ug uban pang dapit sa dakbayan nga magdasok ang daghang mga tawo alang sa paghatag kanila og tukmang kasiguroan.

Dugang pa niya nga lakip sa ilang gihigpitan sa pagbantay mao ang North Bus Terminal  sa maong  dakbayan sanglit daan na nilang   napanglantawan ang pagdagsang  sa daghang pasahero nga mamalik nganhi  sa siyudad alang  sa  ilang klase. (/WC) (BANAT NEWS)