Suspek nga milungkab sa Asialink sikop

CEBU, Philippines - Nasikop sa kapolisan ang usa ka lalaking gituohang usa sa mga milungkab sa Asialink Finance Corporation sa milabay’ng semana.

Si Virgilio Cañacao, 34 , gidala sa Theft and Robbery Section sa Cebu City Police Office, human siya positibong gitudlo sa usa sa mga nakasaksi sa maong  hitabo.

Ang hepe sa kapolisan sa Theft and Robbery Section,  nga  si  Insp. William Alicaba, miingon nga gawas kang Cañacao aduna pa kini laing kuyog nga  mga  menor  de edad atol sa pagpanglungkab

Apan si Cañacao wala makig-alayon  kanila  ug igo lang kini nga mihimakak sa pasangil .

Hinuon   aduna kini giyagyag sa kapolisan nga giingong maoy gitumbok nga reponsabli sa pagpangawat.

“Base ron sa among interrogation niya naay daghang  pangan mi-crop up naay mga minor.So, amo pa nga gi-verify tanan," matud pa ni Alicaba.

Samtang ang suspetsado sa iyang   bahin, hugtanon kaayo  nga mihimakak sa pasangil batok kaniya.

Matud pa niya  nga igo lang siya nga gihapit  samtang naglakaw  paingon  sa  ilang  balay sa  dalan Sikatuna.

 "Wa koy mahimo diha ug ako ilang itudlo basta dili gyud ako mam,”padayag pa ni Cañacao dihang nahinabi kini sa mga tigbalita.

Si Cañacao nag-atubang og laing tulo ka kaso kaniadto  nga may  labot  sa  paghupot og ginadiling drugas ug armas  de fuego.

Kahinumdoman nga niadtong milabay’ng semana, gilungkab ang buhatan sa Asialink ug nabantayan kini sa mga trabahante dihang gi-ablihan nila ang buhatan sayo sa buntag.

Gisakiyo  sa  mga kiriwan  ang  upat  ka  laptop,  upat  ka cell phone,  ug  P100 mil  nga cash  gikan  sa ilang  kaha  de yero. (/WC) (BANAT NEWS)